Во близина на местото живее припадник на една од двете криминални групи чии континуирани пресметки и ривалство беа првично доведени во врска со синоќешниот пожар во кафулето „Фонтана“ во ТЦ „Мавровка“
Вкупно пет пушки, два пиштола, рамки за муниција и 2,5 килограми хероин се пронајдени синоќа и денеска на локација во општината Бутел во Скопје, соопшти МВР. Конкретната локација на која се пронајдени оружјето и дрогата се наоѓа на улицата „Алпи“.
„Бирото за јавна безбедност – Оддел за криминалистичка полиција во координација со СВР Скопје – Единица за недозволена трговија со дрога, синоќа и денеска, со наредба на судија на претходна постапка од Основен суд Скопје 1, презеде мерки и активности на локација на улица ‘Алпи’ во Скопје и во специјално направени бункери пронајде повеќе видови оружје, меѓу кои три автоматски пушки, една снајперска пушка, два автоматски пиштоли со пригушувачи, рамки со муниција, една полуавтоматска пушка, кое потекнува од кривично дело тешка кражба од продавница за оружје. При пребарување на теренот, во специјално направен бункер пронајдени се околу 2,5 килограми хероин. Се преземаат мерки за расчистување на случајот“,
пишува во соопштението од МВР.
Извор од полицијата вели дека прво синоќа се пронајдени две парчиња оружје, а денеска уште пет парчиња плус дрогата. На местото каде е пронајдено оружјето денеска, како што јавија некои медиуми, беше и директорот на Бирото за јавна безбедност при МВР, Сашо Тасевски.
Засега нема информации за позадината на настанот – кој го украл оружјето, зошто било оставено на ова место и, особено, зошто улицата „Алпи“, како што вели нашиот извор, синоќа била блокирана со контејнери од едната страна.
Една од верзиите на кои работи истрагата е базирана на сознанието дека во близина живее припадник на една од двете криминални групи чии континуирани пресметки и ривалство првично беа доведени во врска со синоќешниот пожар во кафулето „Фонтана“ во ТЦ „Мавровка“. Но, контра оваа верзија оди првичниот наод од увидот на вештакот и инспекторите на МВР во „Фонтана“, кои заклучија дека пожарот бил предизвикан од краток на спој на инсталацијата меѓу компјутерот и фискалниот уред во кафулето. Притоа, дилемата што се наметнува е дали и зошто би биле вклучени компјутерот или фискалниот уред, кога со мерките за коронавирусот кафулињата и рестораните не смеат да работат.