Осомничениот стружанец се товари за кривичното дело неовластено производство и пуштање во промет на наркотични дроги, психотропни супстанции и прекурсори
Секторот за внатрешни работи (СВР) Охрид поднел кривична пријава против 42-годишен жител на Струга, откако кај него бил пронајден и одземен хашиш.
Дрогата кај осомничениот со иницијали Ј. П., според полициските инфомации, била пронајдена во момент кога тој излегувал од фабрика за производство на медицински канабис во Охрид.
„При излез од фабрика за производство на медицински канабис во Охрид, полициски службеници извршиле преглед на пријавениот, при што кај него бил пронајден и одземен хашиш“,
се вели во информацијата од СВР Охрид.
Со кривичната пријава осомничениот стружанец се товари за кривичното дело неовластено производство и пуштање во промет на наркотични дроги, психотропни супстанции и прекурсори.
Од СВР Охрид информираат уште за еден случај во кој била запленета марихуана, што вчера попладне бил реализиран на локалниот пат помеѓу струшките села Велешта и Октиси.
Во 18:15 часот полициски службеници од Одделот за внатрешни работи (ОВР) Струга го лишиле од слобода четириесет и седумгодишниот С. А. од Октиси, откако при преглед на возилото што го управувал пронашле и одзеле марихуана.
„При контрола во сообраќајот, полициските службеници сопреле патничко моторно возило ‘пежо’ со струшки регистарски ознаки, кое го управувал и по извршен преглед пронајдена и одземена е марихуана“,
велат од СВР Охрид.
Оттаму додаваат дека по целосно документирање на настанот, против лицето ќе биде поднесена кривична пријава.