Претседателот Стево Пендаровски вечерва донесе нова одлука за прогласување вонредна состојба на територијата на целата држава.
Одлуката е донесена врз основа на член 125 и член 126 од Уставот на предлог на Владата вечерва, а е во времетраење од осум дена, почнувајќи од 15 јуни 2020 година, откако денеска беше постигнат политички договор, предвремените парламентарни избори да се одржат на 15 јули 2020 година.
„Прогласување на вонредна состојба се донесува со цел да се овозможи непречена подготовка на изборите, а особено спроведување на мерки за заштита на јавното здравје за време на изборниот процес, во услови на пандемија на коронавирусот прогласена од Светската здравствена организација“,
соопштија од Кабинетот на претседателот на државата.
Вонредната состојба во времетраење од осум дена ќе овозможи непрекинато да се одвива изборниот процес, да се донесе решение за изборите од страна на претседателот на Собранието и изменет роковник од страна на Државната изборна комисија за одржување на изборите на 15 јули.
По постигнатиот политички договор, претседателот Пендаровски очекува институциите навремено да ги преземат сите активности од нивна надлежност со цел квалитетна и комплетна подготовка и спроведување на изборниот процес.
Во таа смисла претседателот Пендаровски очекува деновите од вонредната состојба да бидат искористени единствено да се донесат неопходните одлуки и протоколи за организирање и спроведување на изборите, со акцент на мерките за заштита на јавното здравје.
Претседателот Пендаровски очекува предвремените парламентарни избори да бидат фер, слободни и демократски, имајќи ја предвид евроатлантската перспектива на земјата.
За вечерва Владата закажа уште една седница, а за заклучоците, како што најавија од прес-службата ќе информираат преку соопштение.