Министерот вели дека проектот вклучува целосна конзервација на објектите и на бедемите, структурна стабилизација на загрозените делови, како и современи археолошки истражувања, кои ќе овозможат долгорочна заштита и достапност на локалитетот за јавноста
Почеток на сеопфатен проект за истражување, заштита, конзервација и ревитализација на локалитетот Виничко Кале, најави денеска министерот за култура, Зоран Љутков.
Проектот, како што рече Љутков, ќе го реализира Министерството за култура преку институциите НУ Национален конзерваторски центар – Скопје, НУ Археолошки музеј – Скопје и локалниот Музеј „Теракота“ – Виница.
„Проектот вклучува целосна конзервација на објектите и на бедемите, структурна стабилизација на загрозените делови, како и современи археолошки истражувања, кои ќе овозможат долгорочна заштита и достапност на локалитетот за јавноста“,
најави тој.
Целта е, како што рече Љутков, Виничко Кале да стане централна точка за културен туризам, научни истражувања и едукативни програми во овој дел на државата.
„Тоа не значи само зачувување на наследството, туку и нова перспектива за економски и туристички развој на целиот регион. Локалитетот ќе стане жив културен простор, отворен за сите граѓани, посетители и идни генерации“,
додаде тој.
Министерот рече дека Општина Виница, во изминатиот период, вложила значителни средства и напори во обнова на културната инфраструктура. Завршена е реконструкцијата на киносалата, која доби нов покрив и фасада, а целосно е обновена и Сината сала при Домот на културата „Тошо Арсов“ – простор кој денес повторно живее со настани, концерти и театарски претстави.