Вчера во Арената А1 пријавените лица беа вакцинирани со руската вакцина „спутник В“. Во оваа фаза ќе бидат имунизирани лица од т.н. критична инфраструктура – вработени во МВР, АРМ, новинари, возачи на автобуси, пожарникари, воспитувачки во градинките, вработени на патарини и други
Во Спортскиот центар „Борис Трајковски“ и денеска продолжува масовната имунизација на населението против ковид-19, која стартуваше вчера за кога беа закажани 3 000 термини. Вчера сите пријавени примиле вакцина.
Министерот за здравство Венко Филипче синоќа оцени дека во првиот ден се вакцинирале по околу 300 лица на час, односно околу 3 000 дневно.
„Денеска се вакцинираа дел од здравствените работници, како и еден дел од припадници на МВР. Утре продолжува вакцинацијата на МВР и започнува на припадниците на АРМ. Колегите ме информираат дека целиот систем функционира беспрекорно и тоа многу ме радува. Да бидеме максимално претпазливи во неделите што следуваат и да ги почитуваме мерките без исклучок“,
објави синоќа на Фејсбук Филипче и потсети дека од денеска стапуваат во сила поригорозни мерки и повика сите да дадеме придонес во битката со пандемијата.
Вчера во Арената А1 пријавените лица беа вакцинирани со руската вакцина „спутник В“. Во оваа фаза ќе бидат имунизирани лица од т.н. критична инфраструктура – вработени во МВР, АРМ, новинари, возачи на автобуси, пожарникари, воспитувачки во градинките, вработени на патарини и други.
На терен работи тим од 20-ина медицински сестри и пет доктори во две смени. Во салата се одредени места каде што вакцинираните се под опсервација 15 до 20 минути. На самото место има екипи на Итна медицинска помош, доколку има потреба да интервенираат.
Во однос на вакцината на „Астра Зенека“, таа сега им се дава на повозрасни граѓани и нема никаква контраиндикација, а се чекаат насоки дали оваа вакцина ќе им се дава и на помлади од 60 години.
„Ние ќе го чекаме официјалниот став на Европската агенција за лекови (ЕМА) чиј борд ќе заседава помеѓу 6 и 9 април и, согласно одлуката, и ние ќе постапиме. Засега добро се одвива вакцинацијата на постари граѓани со ‘Астра Зенека’ и нема никаква контраиндикација или некоја препорака за внимателност“,
изјави вчера Филипче.
Посочи дека некои национални агенции се внимателни – Германија запрела со „Астра Зенека“ и помлади лица што примиле прва доза од таа вакцина добиваат втора доза од друг тип вакцина, на пример „Фајзер“.
На прашањето на што треба да внимаваат оние граѓани што примиле „Астра Зенека“, дали треба да направат некаква контрола или крвна слика и како да ги препознаат симптомите на нуспојавите од вакцината, подвлече дека нема простор за паника, вакцината на „Астра Зенека“ е безбедна и граѓаните треба да бидат спокојни.
„Нема никаква препорака дека кој било граѓанин што примил таква вакцина треба да прави нешто во смисла на превенција. Во делот на давањето вакцина, како што кажав, ќе ги чекаме препораките, меѓутоа нема простор за паника, вакцината е безбедна, тие тромботични ефекти се толку ретки што се споредуваат со тромботични ивенти и кај тие исти групи граѓани според возраста и полот и согласно други здравствени состојби така што граѓаните треба да бидат спокојни“,
одговори Филипче.
Процесот на имунизација против коронавирусот во земјава почна на 17 февруари со вакцинирање на здравствените работници.
Во државава досега пристигнаа 78 000 вакцини, од кои 48 000 се донација од српската влада.