Здружението за духовно обединување на Сетинци, Попадинци и Крушоради од Лерин, кое во јавноста стана познато како донатор на повеќе споменици во проектот „Скопје 2014“, и самото добивало пари буџетот на тогашната влада на Никола Груевски, објавува Призма повикувајќи се на базата на податоци „Отворени финансии“.
Вкупната сума што ова здружение по повеќе основи ја добило е над 100 илјади евра. Првите исплати се совпаѓаат со почетокот на проектот „Скопје 2014“, односно во 2010 година, што е 2 години пред Здружението да ги донира седумте споменици за Општина Центар и Градот Скопје, а последната е евидентирана во 2017 година.
Парите биле исплаќани од Владата, МНР и Министерството за култура – како „трансфери до невладини организации“ (Владата), како „други оперативни расходи“ и „други договорни услуги“ (МНР) и како „други трансфери“ и „трансфери до невладини организации“ (Министерство за култура).
Најмногу пари од Министерство за култура
Најмногу пари, според Призма, се исплатени од Министерството за култура, околу 53 илјади евра, од Владата околу 34 илјади евра, а од МНР нешто над 16 илјади евра.
Името на организацијата се наоѓа во секоја од годишните програми за финансирање проекти од областа на културата на Министерството за култура од 2008 до 2016 година. Најчесто се одобрувани пари за организирање настани со културно-уметнички друштва и пејачи од Македонија во Грција, но и обратно, изведби на ора и песни од Егејска Македонија кај нас.
Во 2010 година организацијата се јавува и како коиздавач на „Јубилеен календар за егејскиот дел на Македонија за 2010 година“, издание кое е поддржано од Министерството. Во програмите за финансирање не се наведени сумите што се доделувани, како и дали тие се потрошени за намената.
Парите што доаѓаат од сметката на Владата се исплаќани врз основа на програмата за финансирање здруженија и фондации. Во сите достапни годишни програми за финансирање проекти од Владата од 2012 до 2016 година се јавува здружението, кое е поддржано со иста сума секоја година – 300 илјади денари, односно околу 5 илјади евра.
Парите се исплаќани за проектот „Културниот идентитет на Македонците по потекло од егејскиот дел за јакнење на довербата и коегзистенцијата меѓу македонскиот и грчкиот народ“. Како активности најчесто се наведувани посети на историски места во Македонија, организација на средби, концерти и трибини, турнеи на културно-уметнички друштва во Грција и организирано собирање фотографии и документи по повод новата поставка во Музејот на Македонија од прогонството на Македонците од егејскиот дел на Македонија, а некои години планирано е и поставување спомен-плочи на локации каде што се лекувале ранетите борци од Граѓанската војна во Грција.
Парите во најголем дел се наменети за патни трошоци, а во владиниот документ од 2012 стои дека во извештајот на организацијата не се содржани податоци дали и како се спроведени активностите наведени во проектот.
Власта ги дарувала невладините донатори и пред 2010 година
Меѓутоа, извештаите за поддршка на проекти од програмите на Министерството за култура и на Владата покажуваат дека Здружението добивало средства и во периодот од 2007 до 2010, што не е опфатено со базата на податоци. Сепак, податоци за тоа нема во објавената база на Министерството на финансии бидејќи таа овозможува да се пребаруваат исплатите од државата од 2010 година наваму.
Но, во старите изданија на „Службен весник“ може да се најде и одлуката на Владата за финансирање здруженија и фондации во 2009 година, каде што, исто така, се определени 220 илјади денари за оваа организација, за промоција и заштита на правата на Македонците од егејскиот дел на Македонија. Во „Службен весник“ најдовме и податоци за финансирање во 2007 година со 247.000 денари, односно нешто повеќе од 4 илјади евра, без да се наведе за каков проект станува збор.
Од МНР се добивани пари најверојатно според програмата за финансирање проекти на дијаспората, но кај Министерството не може да се најде регистар на вакви поддржани активности на здруженија за да се види за што станува збор.
Призма претходно забележа и други трансфери кон оваа организација, како што е донацијата на „ауди А4“ и деловен простор во центарот на Скопје од Владата кои, пак, му се одземени во 2017 година, по промената на власта.
Во последните две години не се евидентирани трансфери кон ова здружение.