Нерасчистените подрумски „тајни“ и постапувањето на полицијата
Една недела откако полицијата влезе во Градскиот трговски центар да проверува дали копачи на криптовалути „крадат“ струја, случајот е затворен. Сепак, за кратко време се создаде „згура“ од оправдано незатворени сомнежи, пренесува „Призма“ во последната анализа.
Додека јавноста „принудно“ почнува полека да учи што се тоа криптовалути, а случајот избледува, „зјае“ дилемата дали полицијата предвреме се откажа од испитување на случајот. Особено ако се земе предвид акцијата од викендот, кога двајца од секторот за информатика во Железници беа уапсени, откако претходно биле пријавени дека ја користеле канцеларијата како „рудник“ за криптовалути, а потрошувачката на струја скокнала.
Таков „скок“ во потрошувачката во ГТЦ не е забележан, ако се суди според изјавата на директорот Ѓоко Трајчевски, но тој, за БИРН, потврдил дека фирмата на Габриел Бајрам не плаќа сметка за струја, од проста причина што во повеќето магацини нема броила, па нема ниту во просторијата што од април годинава ја закупила неговата „Клиник трејд“.
Семејството Бајрам демантираше дека некој од нив копал криптовалути, меѓутоа останува дилемата дали Габриел Бајрам го искористил фактот што во магацинот нема броило и „копал“ биткоини без да плаќа струја.
Ова, како и фактот што во август годинава до МВР стигнала пријава за истиот простор и за истото дело и полицајците биле на истата локација и дошле до истиот заклучок како и пред една недела, нужно го отвора прашањето за постапката на полицијата во овој случај.
Службата за односи со јавност во Обвинителството за БИРН одговори дека никој до нив не пријавил ништо. Тоа значи дека полицијата во вторникот, без насоки од јавен обвинител, по излегувањето на терен, самата проценила дека нема кривично дело.
Ниту дежурниот обвинител, ниту неговиот заменик не биле прашани за насоки што да прават со пријавата што стигнала во 12.45 часот, дека во подрумските простории на ГТЦ, кои се на околу двесте метри од скопското обвинителство, „имало поставено машини за копање криптовалути“.
„БИРН разговараше со неколкумина обвинители и истражители за случајот, но сите се повикале со Законот за кривична постапка кој го регулира ова прашање. Велат, нормално е што полицијата веднаш излегла на самото место и дека има право да процени дали за некој настан треба да го извести обвинителот за да добие насоки дали и како да постапува. Но, имајќи ја предвид праксата, според која, слободната проценка на полицијата досега значела и повик до обвинителот што да се прави во случај со далеку побенигни случаи како за ‘украдени кокошки’. Ова особено ако се знае дека на првичните видеа што беа споделени во јавноста се гледа дека во подрумот има компјутерска опрема и ригови“, овде полицијата требало да побара консултација со јавен обвинител“,
пишува „Призма“ во анализата.
Непосредно пишува понатаму откако полицијата замина од ГТЦ, во јавноста беа споделени други видеа, од кои се гледа дека компјутерската опрема се „багажира“ од магацинските простории на трговскиот центар.
„Тоа во правна смисла биле средства за извршување на кривичното дело.“
вели обвинителка за БИРН и дополнува дека полицијата најмалку што можела да направи е да ги попише предметите, или да побара насока од обвинител да се запечати просторот и да се обезбедат дополнителни докази, кои натаму со стручно вештачење би потврдиле дали има основа за отворање истрага.
Целиот текст можете да го прочитате ТУКА.