Четиринаесет обвинети во предметот за изборни измами „Титаник“, кои СЈО ги смести во групата припадници на злосторничко здружување, нема да одговараат за ова кривично дело бидејќи застаре лани, пишува „Призма“.
Тоа значи дека поранешниот пратеник Илија Димовски, ексзаменичката на министерот за правда Билјана Бришковска-Бошковски, поранешниот градоначалник на Пустец, Едмонд Темелко, Мунир Пепиќ и други ќе останат на обвинителна клупа, но им се „минусира“ по едно кривично дело за кои првично беа обвинети.
Предвидената казна за ова дело е до три години затвор, што значи дека апсолутната застареност настапува по двојно повеќе време, односно по шест години. Бидејќи обвинетите ги сториле последните дејствија во 2014, рокот на застареност од шест години истекол лани.
Но, истото дело не застари за организаторите на групата, а тоа се Никола Груевски, Миле Јанакиески, Кирил Божиновски, Гордана Јанкулоска, Мартин Протоѓер. За нив делото застарува во 2024.
Во „Титаник“ обвинети се вкупно 21 лице за кривични дела поврзани со изборите. Илија Димовски, покрај за застареното злосторничко здружување, се товари и за злоупотреба на средствата за финансирање на изборната кампања, Билјана Бришковска-Бошковски и за фалсификување исправа, Едмонд Темелко за повреда на избирачкото право и поткуп при избори и гласање, Мунир Пепиќ и за повреда на избирачкото право итн.
Првото рочиште од судскиот процес за „Титаник“ беше закажано за 2 април 2018 година, а во моментов сè уште се наоѓа во доказна постапка. Предметот важи за еден од најобемните на СЈО со речиси 6 000 материјални докази, над 1 000 „бомби“ и над 200 сведоци.