30 јуни 2020 е датумот кога формално згасна СЈО. На 29 јуни пред четири години во само еден ден беа поднесени 17 обвиненија.
Од институција со над 100 вработени и ангажирани, а сега со едвај 15, поранешното СЈО е само музеј што ги чува „бомбите“ и меморијата на заробена држава, пишува „Призма“. Во зградата нема интернет, а за одржувањето се грижат тие што останале таму. Од десет обвинители, пет сѐ уште работат во СЈО, но повеќе не се специјални и се водат како основни јавни обвинители. Интернет користат од мобилен телефон, а немаат ниту стручни соработници.
„Обвинителите што уште се таму немаат записничар. Таа работа повремено ја работат истражителите, кои, како што велат самите обвинители, некогаш биле ‘најмоќното оружје’ на СЈО. За сѐ што им треба да преземат одат до скопското или Обвинителството за организиран криминал, за да им се парафираат документи или да се стави печат. Иако многу ретко, сведоци сѐ уште доаѓаат за истрагите што ги водат обвинителите што останаа во СЈО. Атмосферата на празнотија се рефлектира во квалитетот и брзината на истрагите, па ‘Актор’ и ‘Пропаганда’ многу потешко ќе се сработат без поддршката од стручни соработници и истражители што порано ја имаа обвинителите“,
велат од СЈО за „Призма“.
„Бомбите“ и натаму се во објектот, а обезбедувањето што останало таму е токму поради нив и доказите. Две од заменичките на Катица Јанева, обвинителките Ленче Ристоска и Елизабета Јосифовска, се задолжени за протоколите на чување, наведува „Призма“. Но „бомбите“ една година немаат моќ да бидат докази во постапките, освен во обвиненијата што се поднесени до 30 јуни 2017. А анализата на БИРН покажала дека дури девет од 20 обвиненија на СЈО што беа првично поднесени и по четири години немаат правосилна пресуда и сѐ уште се судат во скопска единица.
„Правосилно завршени се само шест од 22 предмети за кои беа поднесени обвиненија. Шест сѐ уште се наоѓаат во жалбена постапка пред второстепениот суд, меѓу кои и предметот за масовно прислушување ‘Таргет-Тврдина’. Активно се судат 14, а два предмета чекаат прво рочиште ‘Плацови на Водно’ и ‘Поштенска банка’. Има и две затворени истраги за ‘Попис’ и ‘Рендген’, но обвинение за нив нема да има“,
пишува „Призма“.
Целиот текст на „Призма“ можете да го прочитате тука.