Издадено е решение за забрана за работа на локалот до отстранување на неправилностите
Педесет и осумгодишен кумановец, сопственик на кабаре во Куманово, е приведен во рамки на најавените засилени полициски контроли на ноќни клубови и кабареа на територија на државата.
Според информациите што ги објави МВР во врска со случајот, сопственикот на кабарето Т.В. (58) од Куманово бил затекнат како од своето возило паркирано пред угостителскиот објект изнесува противпожарни апарати и ги внесува во клубот. Веднаш потоа полициски службеници од Секторот за внатрешни работи (СВР) Куманово извршиле контрола во објектот каде што пронашле и одземале пиротехнички средства.
„Лицето е лишено од слобода и во полициска станица, во присуство на адвокат, со него е извршен службен разговор, а од инспектор за заштита и спасување издадени се прекршочни платни налози и издадено е решение за забрана за работа до отстранување на неправилностите“,
информираат од МВР.
Владата наложи засилени проверки на сите ноќни локали, дискотеки и кабареа на територија на целата држава по трагедијата во дискотеката „Пулс“ во Кочани каде што во пожар загинаа 59 лица, а 192 се повредени.