Покрај него, приведена е и Зинаида Разиќ-Халиловиќ, раководителка на Одделот за економски, финансиски, сметководствени и општи работи во Домот. Приведени се под сомнение дека како соучесници сториле тешки кривични дела против општата безбедност на луѓето и имотот. Ексдиректорот на Домот, Мирсад Бакаловиќ, дополнително се товари за злоупотреба на службената положба и овластување
Полицијата на Тузланскиот Кантон го уапси Мирсад Бакаловиќ, поранешен директор на Домот за стари лица во Тузла каде што на 4 ноември годинава избувна пожар во кој животот го загубија 17 лица.
Покрај него, приведена е и Зинаида Разиќ-Халиловиќ, раководителка на Одделот за економски, финансиски, сметководствени и општи работи во Домот. Приведени се под сомнение дека како соучесници сториле тешки кривични дела против општата безбедност на луѓето и имотот. Ексдиректорот на Домот дополнително се товари за злоупотреба на службената положба и овластување.
Според Кантоналното обвинителство на Тузланскиот Кантон, во периодот од февруари 2024 година до 4 ноември 2025 година, осомничените свесно не ги спровеле пропишаните мерки за противпожарна заштита и општа безбедност во Домот, иако знаеле дека станува збор за објект со висок ризик во кој се сместени особено ранливи категории лица – 180 постари корисници, од кои 110 тешко болни, неподвижни или инвалиди.
Според досегашната истрага, Бакаловиќ и Разиќ-Халиловиќ не обезбедиле потребен број медицински персонал и лица за нега во ноќните смени ниту, пак, обезбедиле соодветен систем за рано предупредување и спречување на пожари, технички услови за евакуација, ниту надзор над забраната за употреба на електрични уреди.
Поранешниот директор дополнително е осомничен за вработување луѓе без потребни квалификации.
Инаку, ексдиректорот на Домот, Мирсад Бакаловиќ, поднесе оставка од функцијата утрото по пожарот.