Од Град Скопје реагираа дека советниците на ВМРО-ДПМНЕ одбиле да ја стават на дневен ред точката по барање на приватните превозници, со која тие бараат зголемување на надоместот за јавен превоз, сѐ со цел за да се продлабочи кризата во јавниот превоз и да се зголеми хаосот
По само два дена откако во јавниот превоз се вклучија приватните превозници, денеска тие ги исклучија автобусите од сообраќај. Причината за ваквиот потег е револтот од тоа што и на денешната седница на Град Скопје не беше разгледано нивното барање за зголемување на таксата по километар.
Иницијативата на приватните превозници била доставена вчера околу 15:30 часот до претседателот на Советот на Град Скопје, Трајко Славески. Тој денеска информира дека иницијативата била доставена доцна за да биде вклучена на седницата.
„Иницијативата е доставена доцна за да биде вклучена во оваа седница. Иницијативите се доставуваат до градоначалникот за мислење, а што не било случај со оваа. Таа ќе биде доставена денеска до градоначалничката Арсовска. Откако ќе биде разгледана од нејзина страна, иницијативата треба да биде вратена до Советот“,
објасни Славески.
Од Град Скопје реагираа дека советниците на ВМРО-ДПМНЕ одбиле да ја стават на дневен ред точката по барање на приватните превозници, со која тие бараат зголемување на надоместот за јавен превоз, сѐ со цел за да се продлабочи кризата во јавниот превоз и да се зголеми хаосот.
Приватните превозници од понеделникот се вклучија во јавниот градски превоз, но не со целиот капацитет, туку само оние превозници кои имаат финансиски можности. Тие минатата недела апелираа до градоначалничката на Град Скопје, советниците и Владата на заеднички состанок да најдат заеднички прифатливо решение за нивното барање за зголемување на цената за изминат километар.
„Приватните превозници ќе го дадат својот максимум од понеделник, односно ќе се вклучиме во раните утрински часови онолку колку што можеме, не со целиот капацитет, со цел за неколку дена да им излеземе во пресрет на граѓаните во градот Скопје. Воедно, ја користиме оваа прилика да се обратиме до сите советници во Градот Скопје – ве молиме со консензус да изгласате покачување на цената за изминат километар со цел подобрување на состојбата во јавниот градски превоз. Со покачена цена се обврзуваме да го обновиме нашиот возен парк со еколошки климатизирани автобуси“,
изјави во петокот Јовица Зафировски.
Проблемот со јавниот градски превоз кулминира во четвртокот откако поради недостиг на нафта, поголем дел од автобусите на ЈСП останаа паркирани во нивните бази. Во сообраќај беа пуштени 25 автобуси кои работат на природен гас и уште неколку кои имаат резерва на нафта. Вонредна седница одржа Владата, на која беше донесена одлука да се интервенира со нафта од државните резерви, со што автобусите имаа нафта за седум дена. Вонредна седница истиот ден одржа и Советот на Град Скопје на која беше поздравена одлуката на Владата за позајмување нафта од државните резерви за потребите на Јавното сообраќајно претпријатие (ЈСП) и воедно, побараа заедно, во координација со ЗЕЛС, да продолжат разговорите со Град Скопје за нормализирање на состојбите во градот.