Криминалната група дејствувала подолг временски период, со цел да се стекне со противправна имотна корист. Со своите незаконски дејства осомничените предизвикале штета на државниот буџет во висина од над 430 милиони денари
При обид за влез во државата на граничниот премин „Долно Блаце“ вчера е лишен од слобода С. А., државјанин од Косово, за кого постои сомение дека сторил кривично дело – злосторничко здружување и даночно затајување.
Ова притворање е продолжение на акцијата од 25 август, кога Управата за финансиска полиција спроведе голема акција на подрачјето на општините Липково, Куманово и Желино, при што во соработка со Специјалната антитерористичка единица (САЕ) „Тигар“, се лишени од слобода седум лица.
„Од страна на овластени службени лица од Управата за финансиска полиција лицето веднаш е преземено и изведено пред судија на претходна постапка што му определи мерка притвор во времетраење од 30 дена. Лицето е спроведено во кумановскиот затвор“,
информираат од Управата за финансиска полиција.
Уапсените лица во спроведената акција од пред два дена се осомничени за кривични дела злосторничко здружување, даночно затајување, даночна измама и перење пари и други приноси од казниво дело.
Според соопштението на Финансиската полиција, акцијата е резултат на двегодишна опсежна предистражна постапка, водена под раководство на Основното јавно обвинителство за гонење организиран криминал и корупција (ОЈО ГОКК).
Криминалната група дејствувала подолг временски период, со цел да се стекне со противправна имотна корист.
Со своите незаконски дејства, осомничените предизвикале штета на државниот буџет во висина од над 430 милиони денари.