Полскиот премиер Доналд Туск во својата честитка веќе ја најави и утрешната посета на Мерц на Варшава, што ќе биде и негова прво патување во странска земја како германски канцелар
По успешното второ гласање во кое лидерот на конзервативците Фридрих Мерц го доби потребното мнозинство од Долниот дом на Будестагот и стана нов германски канцелар, почнаа да пристигнуваат првите честитки од европските лидери.
На второто гласање, кое се одржа попладнево, Мерц беше избран со 325 гласа „за“. „Против“ беа 289 члена на Долниот дом на парламентот, еден бил „воздржан“, а три гласа биле неважечки.
Второто гласање, за кое постоеше неизвесност дали ќе се одржи денеска, уследи откако во првиот круг лидерот на Христијанскодемократската унија (ЦДУ) не успеа да го освои потребното мнозинство за да стане канцелар, бидејќи ја доби поддршката на 310 од 630-те члена на Долниот дом на парламентот, а за мнозинство му беа потребни 316 гласа.
Меѓу првите лидери кои му честитаа на Мерц за изборот на функцијата е украинскиот претседател Володимир Зеленски, кој на социјалните мрежи напиша дека се надева на поголемо германско лидерство во европските и трансатлантските работи.
„Искрено му честитам на Фридрих Мерц за неговиот избор за нов федерален канцелар на Германија. Украина е длабоко благодарна за поддршката од Германија и нејзиниот народ. Вашата помош спаси илјадници и илјадници украински животи. Искрено се надеваме дека Германија ќе стане уште посилна и дека ќе видиме поголемо германско лидерство во европските и трансатлантските работи. Ова е особено важно со оглед дека иднината на Европа, која е во прашање, ќе зависи од нашето единство“,
напиша Зеленски.
I sincerely congratulate @_FriedrichMerz on his election as Germany’s new Federal Chancellor.
— Volodymyr Zelenskyy / Володимир Зеленський (@ZelenskyyUa) May 6, 2025
Ukraine is deeply grateful for the support of Germany and its people. Your helping hand has saved thousands and thousands of Ukrainian lives.
We sincerely hope that Germany will grow…
Кратко по гласањето во германскиот парламент, на Мерц му честита и претседателката на Европската комисија, Урсула фон дер Лајен. Таа својата честитка на платформата Икс ја напиша на германски јазик, нарекувајќи го Мерц докажан пријател и експерт за Европа.
„Честитки за изборот, драг мој Фридрих Мерц… Ќе работиме заедно за силна и поконкурентна Европа. Ви посакувам успех, господине канцеларе, на патот напред“,
напиша таа.
Herzlichen Glückwunsch zur Wahl, lieber @_FriedrichMerz.
— Ursula von der Leyen (@vonderleyen) May 6, 2025
Mit Dir zieht ein ausgewiesener Freund und Kenner Europas ins Kanzleramt ein.
Wir werden uns gemeinsam für ein starkes und wettbewerbsfähigeres Europa einsetzen.
Ich freue mich auf eine enge Zusammenarbeit!
Полскиот премиер Доналд Туск во својата честитка веќе ја најави и утрешната посета на Мерц на Варшава, што ќе биде и негова прва посета на странска земја како германски канцелар.
„Честитки Фридих Мерц! И се гледаме утре во Варшава, канцеларе“,
објави Туск.
Congratulations @_FriedrichMerz! And see you tomorrow in Warsaw, Chancellor.
— Donald Tusk (@donaldtusk) May 6, 2025
На хорот од честитки на германски јазик се придружи и претседателот на Европскиот совет, Антониот Кошта, кој рече дека се радува на заедничката работа на амбициозната европска агенда.
Австрискиот канцелар Кристијан Штокер рече дека „заедничката граница значи и споделена одговорност и дека се радува на претстојната пријателска соработка меѓу владите на двете земји.
Естонската премиерка Кристен Михал наведе дека силна и просперитетна Германија ја зајакнува цела Европа, додека шведскиот премиер Улф Кристерсон нагласи дека Германија е земја со слични размислувања и доверлив сосед.
Финскиот премиер Петери Орпо даде слична нота, велејќи дека улогата и лидерството на Германија се одлучувачки во заштитата на безбедноста на Европа
Чешкиот премиер Петр Фијала изјави дека е задоволен што Мерц ќе ја води Германија, која, како што наведе, е многу тесно поврзана со Чешка во многу области. Тој додаде дека со новиот германски канцелар споделуваат заеднички став за потребата од справување со нелегалната миграција, зајакнување на одбраната и безбедноста и обезбедување конкурентност на Европа.
По гласањето и изборот во Бундестагот, новиот германски канцелар попладнево го очекува набиена агенда.
Првата дестинација од зградата на Бундестагот ќе му биде замокот Белви, каде ќе се сретне со претседателот на Германија, Франк Валтер Штајнмаер, и ќе ја прими потврдата за именувањето за канцелар.
Потоа тој ќе се врати во Бундестагот, каде што ќе положи заклетва.
Од таму, канцеларот повторно ќе се врати во замокот Белви, но овојпат со своите министри, кои ќе ги добијат потврдите за нивните именувања, а претседателот Штајнмаер ќе одржи краток говор.
По сето тоа министрите ќе положат заклетва во германскиот парламент, а досегашниот премиер Олаф Шолц и официјално ќе му ја предаде должноста на Мерц.