Притоа, како што нагласува германската министерка за надворешни работи, не се работи само за технички преговори, туку станува збор „за иднината на нашата заедничка Европа и за мирот кој деновиве е невидено загрозен и кој е од непроценлива вредност“
На ист начин како што Германија најде мир исклучиво во Европската Унија по 1945 година, „така и нам ни требаат сите шест земји од Западен Балкан да бидат во ЕУ за траен мир на нашиот континент“, порача во авторски текст германската министерка за надворешни работи Аналена Бербок, додавајќи оти пристапните преговори со Северна Македонија и Албанија сега мора конечно да се реализираат.
„Ние во ЕУ не можеме само да ги артикулираме нашите очекувања, туку сме должни да го одржиме зборот. Го разбирам разочарувањето во регионот поради дополнителните доцнења. Пристапните преговори со Албанија и Северна Македонија и визната либерализација во согласност со Шенгенскиот договор – и едното и другото сега мора конечно да се реализираат“,
порачува во својот авторски текст Бербок објавен во пресрет на нејзината денешна посета на Сараево кој го пренесува босанскиот портал Кликс.ба.
Притоа, како што нагласува во текстот, не се работи само за технички преговори, туку станува збор „за иднината на нашата заедничка Европа и за мирот кој деновиве е невидено загрозен и кој е од непроценлива вредност“.
Шефицата на германската дипломатија Аналена Бербок денеска е во посета Сараево и Приштина, а утре во рамки на турнејата низ Западен Балкан заминува за Белград, од каде ќе отпатува за Молдавија.