На премиерата е најавено присуството на целата филмска екипа која стои зад ова остварување, кое се вбројува меѓу најуспешните во македонската кинематографија
Македонската јавност вечерва ќе може да ја проследи домашната премиера на документарниот филм „Приказната за Силјан“, во режија на Тамара Котевска. Премиерата ќе се одржи во Македонскиот народен театар со почеток во 20:30 часот.
На премиерата е најавено присуството на целата филмска екипа која стои зад ова остварување, кое се вбројува меѓу најуспешните во македонската кинематографија.
Филмот, кој беше македонски кандидат за престижната награда „Оскар“, зад себе веќе има пронижено неколку награди. Покрај тоа што беше откупен од „Нешнл џиографик“ (National Geographic), „Приказната за Силјан“ се закити со бројни признанија и номинации на релевантни светски филмски фестивали, меѓу кои филмскиот фестивал во Венеција, NYDOC и IDA, наградите Spirit и PGA Award, како и Eye Cinema Audience Award.
Светските критичари го опишуваат како триумф и апсолутен шармер, нагласувајќи ја неговата прекрасна и нежна меланхолија деликатно поврзана со екосистемот.
Овој документарен филм е за издржливоста и моќта на малите дела. Дејството го следи земјоделецот Никола, кој на депонија наоѓа ранет бел штрк. Нивниот кревок, полека граден однос со доверба прераснува во длабока врска која не само што му ја враќа смислата на животот на Никола, туку ги обновува неговите врски со заедницата и ги оживува старите преданија и односот кон природата.