Премиерот Мицкоски во своето обраќање рече дека ова е негова прва официјална посета на Турција, држава со која имаме заеднички елементи во културата, традицијата и одлични односи на македонскиот и турскиот народ
Нашите пријателски односи се јаки исто како што е јак и Камениот мост во Скопје, рече турскиот претседател Реџеп Таип Ердоган на денешната заедничка прес-конференција со премиерот Христијан Мицкоски во Истанбул, Турција, откако ја потпишаа Заедничката политичка декларација за основање на Совет за соработка на високо ниво меѓу владите на Република Северна Македонија и Република Турција.
„Турција е една од првите земји што ја призна независноста на С Македонија. Ние сме две пријателски земји што директно влијаат врз сочувување на мирот на Балканот. Нашите односи се јаки исто како што е јак и Камениот мост во Скопје. Балканот не треба да се гледа како место за конкуренција меѓу народите, туку треба да е поле за заедничка соработка и развој. Она што ги врзува двете земји се Турците што живеат таму и нивната заедници во С Македонија“, рече турскиот претседател.
Се надева дека ќе присуствува на првата седница на Советот што треба да се одржи во Скопје.
Посочи дека минатата година двете земји имале трговска размена од милијарда долари, за кои рече дека треба да се удвојат во првата прилика, но дека е потребно и ревидирање на Договорот за слободна трговија.
Премиерот Мицкоски во своето обраќање рече дека ова е негова прва официјална посета на Турција, држава со која имаме заеднички елементи во културата, традицијата и одлични односи на македонскиот и турскиот народ.
„Имав исклучителна значајна и конструктивна средба со претседателот Реџеп Таип Ердоган. Оваа средба е потврда на традиционалното пријателство, силното партнерство и стратешката соработка меѓу двете земји. Разговаравме за продлабочување на билатералните односи во повеќе сфери, со особен акцент на економската соработка, инвестициите и трговската размена. Турција е еден од нашите најзначајни економски партнери, но и неизоставна сила со големо влијание во регионот. Заедничката заложба е да ги зголемите турските инвестиции кај нас, но и да создадеме нови можности за македонските компании на турскиот пазар“, рече Мицкоски.
Посочи и дека со Ердоган разговарале и за унапредување на соработката во областа на безбедноста, образованието, културата и здравството.
Потенцира дека двете земји се сојузници во НАТО, а нашиот заеднички приоритет е стабилноста и безбедноста во регионот.
Мицкоски и Ердоган потпишаа заедничка политичка декларација за основање на Совет за соработка на високо ниво.
„Советот ќе ја утврди стратегијата за односите меѓу Турција и Македонија во областите на политиката, безбедноста, одбраната, економијата, трговијата, енергијата, транспортот, инфраструктурата, земјоделството и шумарството, медиумите и комуникациите, туризмот, културата, науката, уметноста, младите, спортот, образованието, здравството, животната средина и дигиталната трансформација, како и контактите меѓу граѓаните на двете земји“, вели премиерот.
Рече дека во Ердоган гледа голем поддржувач и пријател, а неговото минато, како и на Турција, се поврзува со неговата татковина.
„Тој е секогаш добредојден во Скопје, Охрид и на кое било друго место кај нас. Се надевам дека тоа ќе го стори многу скоро. Убеден сум дека соработката меѓу двете држави ќе продолжи да се развива во духот на заемното почитување и заедничките интереси со цел да обезбедиме подобра иднина за нашите граѓани“, заклучи Мицкоски.