Мицкоски посочи дека не знае каков е одговорот за оваа средба од страна на Бугарија
Македонија и Бугарија ќе имаат можност да ги изложат своите ставови на билатерална средба пред највисоките претставници на Европската Унија и Соединетите Американски Држави (САД) за време на Самитот на НАТО што ќе се одржи на 24 и 25 јуни годинава во холандскиот град Хаг. Ова денеска го соопшти премиерот Христијан Мицкоски на заедничката прес-конференција со Каја Калас, високата претставничка на Европската Унија за надворешни работи и безбедносна политика, која е во посета на земјава, одговарајќи на новинарско прашање за евентуална средба меѓу претседателката Гордана Сиљановска-Давкова и бугарскиот претседател Румен Радев и во каков формат се планира.
Посочи дека на оваа тема разговарал и на денешната средба со Калас.
„Оваа тема започна уште од средбата и посетата на претседателот на Европскиот совет, Антонио Кошта, за време на хашкиот самит на НАТО да има билатерална средба меѓу претставници од Македонија и од Бугарија. Таму тогаш ќе биде и претседателката Гордана Сиљановска-Давкова и би било одлична можност да има билатерална средба на која би присуствувала и претседателката на Европската комисија, Урсула фон дер Лајен, претседателот на Европскиот совет, Антонио Кошта, како и високата претставничка за надворешна и безбедносна политика на ЕУ, Каја Калас. Го проширивме тој состав и со генералниот секретар на НАТО, Марк Руте, и со дел од земјите членки во НАТО, како и САД, за да можеме да ги кажеме на билатерална средба аргументите. Затоа што од една страна има едни аргументи, од друга страна други аргументи. Кога ќе бидеме сите на иста маса, колку и да трае тоа, добро е да се разговара“,
рече Мицкоски.
Посочи дека македонската страна тој предлог веднаш го прифатила, но оти не знае каков ќе биде одговорот од Бугарија.
„Ние тоа го прифативме и денеска тоа го разговаравме со Калас. Ја потврдивме нашата определба да да опстоиме на тоа што сме го кажале. Разговаравме и со претседателката Сиљановска-Давкова и ќе се подготвиме (за средбата) најдобро што знаеме. Мислам дека е добро е да има таква средба на која ќе можат да се слушнат аргументите од двете страни, особено на маргините на НАТО-самитот. А ние како земја членка на НАТО рефлектираме безбедност“,
рече Мицкоски.
Според него, би било многу добро да се слушнат сите аргументи на еден ваков состанок.
„Сите треба да седнеме и да ги слушнеме аргументите. Можеби од таа страна ќе слушнеме некои аргументи што досега не сме ги знаеле, како на пример, каде исчезнаа 200 илјади Македонци во Западна Бугарија од 1956 до 1965 година“,
кажа премиерот.
Калас на заедничката прес-конференција со Мицкоски не ги коментираше најавите за средба во Хаг.
На прашањето дали и кои се механизмите на Брисел за конечна деблокада на интеграцијата на С Македонија во ЕУ, рече дека има можност нешто да се направи.
Европската претставничка рече дека на состанокот со премиерот Христијан Мицкоски се разговарало и за потенцијалните механизми за надминување на пречките во преговорите, но не сакаше да открие повеќе детали.