Одговарајќи на новинарско прашање за надминување на проблемот со Бугарија, шведската министерка за европски прашања на денешната прес-конференција со нејзиниот домаќин и колега, Орхан Муртезани, рече дека дека добриот дијалог со соседите е добредојден за самиот процес на пристапување. Во тој контекст таа се осврна и на уставните измени, кои, како што кажа, кога ќе се усвојат, сите земји членки на ЕУ ќе треба да го почитуваат тој договор и веднаш да започнат преговорите по поглавја и кластери
Шведската министерка за европски прашања, Јесика Росенкранц, која е во официјална посета на земјава, денеска уште еднаш ја повтори поддршката што нејзината земја ја има кон проширувањето на Европската Унија со нови членки и ги повика македонските власти да го искористат моментумот и да ја придвижат државата кон ЕУ.
Говорејќи на прес-конференција со нејзиниот колега и домаќин Орхан Муртезани, таа порача дека Шведска ја поддржува земјава на тој пат, како со политичка волја така и со конкретни чекори.
Росенкранц во таа насока посочи дека безбедносните предизвици со кои денес се соочува Европа ја прави клучна соработката меѓу Европејците за обезбедување мир, демократија, безбедност и просперитет.
„Горда сум што претставувам влада којашто има широка поддршка за проширувањето на ЕУ. Според последните истражувања, Шведска е меѓу земјите со најсилна поддршка меѓу сите земји членки на ЕУ. 79 проценти од шведската јавност го поддржува проширувањето и тоа ме прави горда, но и убедена дека се движиме во вистинскиот правец“,
рече Росенкранц.
Министерката рече дека проширувањето на ЕУ е суштинско значење во изградбата на побезбеден континент и посилна економија и оти во интерес на целата Унија е Северна Македонија да успее во реформската агенда и да стане дел од Унијата.
„Навистина сега е моментумот за проширување на ЕУ. Поради руската агресија врз Украина, сега е многу повеќе од јасно дека Европа треба да се проширува и да се зајакне соработката и затоа Шведска генерално го поддржува проширувањето. Моето охрабрување до вас е целосно да го искористите овој моментум додека е тука и додека има нова енергија меѓу земјите членки“,
кажа шведската министерка за европски прашања.
Одговарајќи на новинарско прашање за надминување на проблемот со Бугарија, таа посочи дека добриот дијалог со соседите е добредојден за самиот процес на пристапување. Во тој контекст таа се осврна и на уставните измени, кои, како што кажа, кога ќе се усвојат, сите земји членки на ЕУ треба да го почитуваат тој договор и веднаш да започнат преговорите по поглавја и кластери.
„Го поддржуваме секој добар дијалог што може да се постигне во овој контекст, а за самиот процес Шведска знае дека кога ќе се усвојат уставните измени ЕУ и сите земји-членки треба да го почитуваат тој договор и веднаш потоа формално да отпочнат преговорите“,
рече таа.
Росенкранц ја повтори поддршката на Шведска за земјава и во делот на спроведувањето на реформите, особено оние што се поврзани со владеењето на правото, независноста и интегритетот на судството и борбата против корупцијата. Таа рече дека оти верува дека последниот извештај на Европската комисија дава јасни насоки кон тој пат.
Според неа, имплементирањето на реформите и исполнувањето на стандардите е важно не само заради самото членство туку и за самите граѓани и оти ако Северна Македонија ги исполни сите овие реформи ќе биде во подобра позиција и ќе има побрз процес на пристапување кога ќе отпочнат преговорите.
„Вистина е дека во Извештајот за напредокот на земјава се наведува дека има застој во реформите и дека овој чекор мора да оди понапред, особено во реформите во правосудството. И тоа е важно не само заради членството туку и за јавноста. Ова се важни теми не само за Северна Македонија, туку и за сите држави, вклучувајќи ги и земјите членки“,
кажа Росенкранц.
Инаку, шведската министерка за европски прашања на овие теми говореше и во интервју за „360 степени, емитувано вчера вечер. Во него таа, ги упати, безмалку истите пораки, а во делот на Извештајот на ЕК, рече дека она што го гледаме кога го читаме и оценката на Комисијата е дека „Северна Македонија е прилично добро подготвена за следните чекори, но има стагнација во темпото на реформската работа“ и оти тоа темпо мора да се забрза бидејќи има многу реформи кои треба да се спроведат.
На прес-конференцијата со Муртезани таа потсети дека Шведска годинава одбележува 30 години од пристапувањето во Европската Унија и во таа насока посочи на дел од придобивките што земјата ги има од членството во Унијата.
„Станавме побогати, посилни за да се соочиме со предизвиците, а од економски аспект влегувањето на Единствениот пазар беше од суштинска важност за шведските компании. И убедена сум дека Северна Македонија исто така кога ќе стане членка ќе ги има истите бенефити Знам дека патот е тежок и понекогаш долг, но гарантирам дека се исплати да се стане членка“,
рече таа.
Муртезани, од своја страна, истакна дека Северна Македонија останува целосно посветена на европската интеграција преку исполнување на Копенхашките критериуми, спроведување на Реформската агенда и реализација на Планот за раст.
Тој ја нагласи важноста на одржувањето на кредибилитетот на политиката на проширување заснована на заслуги, како и принципиелната поддршка што Шведска ја дава во овој процес.
Министерот посочи дека билатералната соработка меѓу двете земји, особено преку СИДА, резултира со значајни проекти во демократијата, владеењето на правото, родовата еднаквост и животната средина и дека ова партнерство претставува пример за долгорочна и суштинска европска поддршка.
„Шведска и Северна Македонија делат исти принципи – демократска стабилност, почитување на правото и одговорно управување со јавните добра. Затоа сум уверен дека оваа посета ќе ја продлабочи нашата соработка и ќе отвори нови можности за заеднички иницијативи. Во времиња кога Унијата мора да покаже храброст и визија, ние ја потврдуваме нашата определба да бидеме дел од таа визија. Европа што се шири е Европа што верува во себе, а Северна Македонија е подготвена да го сподели тој дух на верба и одговорност“,
рече Муртезани на заедничката прес-конференција со неговата шведска колешка Росенкранц.