Од компанијата им се заблагодарија на пожарникарите, надлежните органи, но и на бизнисмените и граѓаните кои се вклучиле во гаснењето на пожарот
Од компанијата „Пофикс“ чии простории беа зафатени од денешниот пожар во поранешен „Македонија Табак“ во Тетово, преку социјалните мрежи изразија жалење за трагедијата. Причините за пожарот, наведуваат во соопштението, сè уште не се познати, но она што е најважно е дека нема човечки жртви.
„Во оваа прилика, јавно им се заблагодаруваме на противпожарните екипи, градоначалникот на Тетово и надлежните органи кои максимално си ја вршат својата работа на терен, како и на граѓаните и на бизнисмените од Тетово кои се вклучија во гаснењето на огнот. Воено, ја информираме јавноста дека пожарот во голема мера е изгаснат. Со надеж дека ќе ја надминеме оваа ситуација што побрзо, изразуваме жалење за оваа несреќа“,
велат од „Пофикс“.
Дека пожарот е ставен под контрола и е локализиран вечерва изјавија и директорот на Центарот за управување со кризи (ЦУК) Стојанче Ангелов и командантот на тетовската пожарна Ука Алити.
Алити рече дека вечерва сè уште ќе има чад затоа што целата покривна конструкција од големата зградата изгорела и паднала.
„Имаме големи количини на изгорени материјали кои тлеат и затоа сè уште има чад и ќе има и во текот на вечерта. Затоа цела ноќ е предвидено да дежураме за да се избегне опасност повторно да се разгори огнот. Ова беше еден од најголемите пожари во мојата кариера и сме фрлиле неверојатно големи количини вода“,
изјави Алити.