Меѓу храната чиј увоз бил забранет од страна на АХВ се 27 тони говедско мелено месо со потекло од Парагвај и 22 тони ореви со потекло од Казахстан
Спречен е увоз на 50 тони небезбедна храна што би требало да заврши во земјава – соопшти денеска Агенцијата за храна и ветеринарство (АХВ) по контролите на граничните премини извршени во текот на минатата недела.
Меѓу храната чиј увоз бил забранет се 27 тони говедско мелено месо со потекло од Парагвај. При увидот на увозната документација, ветеринарите на АХВ утврдиле дека месото потекнува од објект кој не е одобрен од Агенцијата за храна и ветеринарство, со што не биле испоплнети основните безбедносни стандарди за увоз.
„Односно, постојат сомнежи за здравствена исправност на месото, што претставува ризик за потрошувачите“,
соопшти АХВ.
Забранет е и увоз на пратка со 22 тони ореви по потекло од Казахстан поради несоодветно означување и отстапки во пропишаните критериуми за квалитет и безбедност на храна. Целата пратка е вратена во земјата на потекло.
Од Агенцијата за храна и ветеринарство велат дека контролите на увозот на храна ќе продолжат со засилено темпо со цел да се спречи внес на небезбедни производи.