Нема причина да не ми биде дозволен влез во земјата. Немам ни казна за непрописно паркирање таму, но не сум пожелен. Во РСМ имам спроведено над 500 хуманитарни иницијативи, се обидов да му помогнам на Скопје побрзо да влезе во ЕУ, како и да ги зближам двата народа. Наместо благодарност, добив забрана
Претседателот на бугарската Фондација „Македонија“, Виктор Стојанов, добил доживотна забрана за влез во Северна Македонија, пишува порталот Лупа.бг. Тој веќе имал забрана за влез во земјава во траење од една година и три месеци по чиј истек се упатил кон Скопје, но на граница бил вратен назад бидејќи забраната му била продолжена на неодредено време.
„Нема причина да не ми биде дозволен влез во земјата. Немам ни казна за непрописно паркирање таму, но не сум пожелен. Во РСМ имам спроведено над 500 хуманитарни иницијативи, се обидов да му помогнам на Скопје побрзо да влезе во ЕУ, како и да ги зближам двата народа. Наместо благодарност, добив забрана. Ќе ја запознаам со ова Европската комисија против расизам и нетолеранција (ЕКРИ) при Советот на Европа. На овој начин работите нема да останат незабележани“,
изјавил Стојанов за Лупа.бг.
Тој посочува дека токму поради омразата кон бугарскиот народ, влезот на Северна Македонија во ЕУ бил одложен. Оваа одлука беше донесена на Самитот на Берлинскиот процес во понеделникот во Тирана. Зелено светло на патот кон евроинтеграциите добива само Албанија, за која во јануари следната година се отвора преговарачко поглавје, пишува бугарскиот портал.
„Некои опозициски партии се виновни за заостанатоста на Северна Македонија, како и претседателот Стево Пендаровски. Наместо да гради мостови меѓу двете земји, тој постојано ги уништуваше“,
истакнал Стојанов.
Според него, Албанија целосно заслужува да го продолжи својот пат кон европската интеграција бидејќи имала добро законодавство за малцинските права.
„Во земјата живеат 100 000 Бугари, а во Тирана 12 000. Бугарите таму имаат советници на министри, Бугарите се и директори на претпријатија. Фондацијата ’Македонија’ е активна и во Албанија. Обезбедуваме учебници, алатки, таблети. Таму сме добредојдени и нè чекаат“,
рекол Стојанов.