Мексиканската влада започна судска постапка против „Гугл“ поради одлуката на технолошкиот гигант за корисниците од САД на „Гугл мапс“ да го преименува Заливот на Мексико во Залив на Америка, потврди претседателката Клаудија Шеинбаум. Тужбата следува по неколку неуспешни апели и официјални писма од Мексико до „Гугл“, со барање да не се менува традиционалното име
Промената доаѓа откако американскиот Конгрес, предводен од републиканците, изгласа официјално преименување на Заливот за федералните институции, врз основа на извршна наредба потпишана од претседателот Доналд Трамп во јануари, веднаш по неговото враќање на функцијата. Трамп ја оправда одлуката со тврдењето дека САД имаат најголем удел во активностите во Заливот.
Мексико остро се спротивстави на оваа одлука тврдејќи дека американската извршна наредба има важност само за делот од Заливот кој се наоѓа на американскиот континентален гребен, но не и за целата водна површина која ја делат САД, Мексико и Куба.
„САД можат да го преименуваат својот дел, но немаат овластување да го преименуваат целиот залив“,
изјави Шеинбаум додавајќи дека Мексико бара само почитување на меѓународните договори и географските реалности.
„Гугл“ во својот одговор до мексиканските власти објасни дека промената е дел од долгогодишна пракса да се усогласуваат имињата на географските објекти според официјалните владини извори на секоја земја. Така, на „Гугл мапс“, заливот се прикажува како „Gulf of America“ за корисници во САД, како „Gulf of Mexico“ за корисници во Мексико, а во другите региони се користи комбинираната ознака „Gulf of Mexico (Gulf of America)“.
Мексико, сепак, инсистира дека ваквото именување создава забуна и е во спротивност со меѓународната пракса. Шеинбаум дури и саркастично предложи, како одговор, САД да се нарекуваат „Америка Мексикана“, алудирајќи на историските карти од пред 1848 година, кога голем дел од денешната територија на САД припаѓала на Мексико.
Додека „Гугл“ сè уште нема официјален коментар по повод тужбата, случајот дополнително ги заостри односите меѓу двете земји, кои веќе се соочуваат со трговски тензии и несогласувања околу имиграцијата и други билатерални прашања. Мексико останува на ставот дека ќе ги користи сите правни и дипломатски средства за да го заштити своето географско и историско наследство.