Неготинецот на 2 август годинава до смрт ја претепа партнерката која неколку дена потоа почина. Обвинетиот на судењето призна вина
Основниот суд во Кавадарци изрече 15 години затвор за неготинецот што до смрт ја претепа партнерката во расправија на 2 август годинава. Неговата партнерка, неколку дена по претепувањето, им подлегна на повредите.
Обвинетиот се гонеше за тешка телесна повреда со смртни последици, а на судењето призна вина.
„Основен суд Кавадарци известува дека на ден 22.11.2022 година по одржаната главна и усна расправа, обвинетиот П.Н. од Неготино за кривично дело тешка телесна повреда (член 131 став 4 во врска со став 2 во врска со став 1 во врска со член 12 став 2 од Кривичниот законик), а по дадено признание за вина, огласен е за виновен за настанот што се случи на 02.08.2022 година во Неготино, каде што извршил семејно насилство, во кое оштетената Љ.Г. од здобиените тешки телесни повреди, почина на 06.08.2022 година, со тоа што од страна на судечкиот судија му е изречена казна затвор во траење од 15 години, којашто да биде извршена по правосилноста на пресудата“,
известија од кавадаречкиот суд.
За пресудата да стане правосилна треба да се изјасни и повисокиот апелациски суд доколку се поднесат жалби од странките во врска со висината на казната.