„Информираме дека во однос на престојот на потпретседателката не се побарани средби ниту други програмски содржини и нејзиниот престој и транзит низ земјава се во организација на Амбасадата“, се наведува во информацијата од МНР
Вчерашниот престој на бугарската потпретседателката Илијана Јотова во С Македонија каде што се сретна со претставници на бугарската заедница во земјава бил пријавен по дипломатски пат преку Амбасадата на Бугарија во Скопје, информираат од Министерството за надворешни работи.
Од МНР велат дека во рамките на нејзиниот престој не биле побарани средби или други програмски содржини со официјални претставници на С Македонија.
„Престојот на делегацијата предводена од потпретседателката на Бугарија, Илијана Јотова, во Република Северна Македонија е пријавен по дипломатски пат преку Амбасадата на Република Бугарија во Скопје. Информираме дека во однос на престојот на потпретседателката не се побарани средби ниту други програмски содржини и нејзиниот престој и транзит низ земјава е во организација на амбасадата“,
се наведува во информацијата од МНР.
На средбата со претставниците на бугарската заедница во земјава, во зградата на Амбасадата на Бугарија во Скопје, како што јави новинската агенција БТА, таа им се заблагодарила за храброста да ги бранат својата бугарска самосвест, традиции, јазик и историја.
„Нашата заедничка цел е да го намалиме нивото на тензија, секојдневно да се бориме со овој застрашувачки јазик на омраза што се излева во Северна Македонија во однос на Бугарија и бугарскиот народ, против сите обиди за дискриминација на Бугарите во земјата. Какви и да се постапките на Република Северна Македонија, каква и пропаганда да има, ние нема да отстапиме од договорите што ги имаме. И ако Бугарите не бидат вклучени во Уставот на земјата, нема да има ни педа напредок во преговорите на Република Северна Македонија за европско членство“,
рекла Јотова по средбата со бугарскиот амбасадор во Северна Македонија, Ангел Ангелов, пренесе БТА.
Таа посочила дека Бугарија внимателно ја следи ситуацијата во земјата, „кој и како ги подготвува можните текстови за да ги вклучи Бугарите во Уставот на Северна Македонија, како тие ќе бидат прифатени и како ќе реагираат политичките сили, но пред се институциите во Северна Македонија“.
„Ние секогаш ќе бидеме ваши бранители, исто како што го браневме она невино момче Христијан Пендиков, кое за малку не го загуби животот затоа што се чувствува Бугарин и е член и секретар на бугарски клуб. Не е достапноста на бугарски пасош тоа што го прави човекот, важна е неговата самосвест, а секој што има бугарска самосвест ќе биде заштитен“,
посочила Јотова потсетувајќи дека бугарскиот претседател Румен Радев го покренува прашањето за правата на Бугарите во Северна Македонија на секој самит во Брисел, вклучително и на последниот состанок на Европскиот совет.
Илијана Јотова во Скопје положи цвеќе на барелјефот на Васил Левски на зградата на амбасадата. Нејзиниот престој во Скопје беше на враќање од Косово, каде што се сретна со претседателката Вјоса Османи по повод 15-годишнината од независноста на државата.