Брнабиќ денеска во Скопје не сакаше да ги коментира односите и разговорите за црковните прашања меѓу Српската православна црква и МПЦ-Охридска архиепископија, но им се заблагодари на СПЦ и на српскиот патријарх Порфириј, затоа што, како што оцени, се обидуваат да решат прашања што придонесуваат за регионална соработка, разбирање и поврзување
Односите меѓу Северна Македонија и Србија се на исклучително високо ниво во сите области, истакна претседателот на Владата Димитар Ковачевски на денешната заедничка прес-конференција со премиерката на Србија Ана Брнабиќ на маргините на Регионалниот самит во организација Македонија 2025.
На средбата која претходеше на присуството на двајцата премиерот на Регионалниот самит, како што истакна Ковачевски станало збор за соработката помеѓу Северна Македонија и Србија, притоа потенцирајќи ги исклучително високото ниво на пријателски односи и соработка на сите нивоа, не само на економскион план, туку и во транспорт и врски, земјоделството и друго. Ковачевски потенцира исто така дека за истакнување е дека нашата трговска размена надмина една милијарда евра, и тоа дека Северна Македонија го зголеми извозот за 40 проценти, додека Србија кај нас за 20 проценти.
„Среќен сум што денеска имавме средба со премиерката на Србија на која што разговаравме за соработката со Република Србија. Ние имаме односи кои се на исклучително високо ниво во сите области, на само во политичката соработка, економската, но и во сите други вклучително транспортот и врските, земјоделството, внатрешните работи итн.“,
потенцираше Ковачевски.
Тој додаде дека за истакнување е и тоа што нашата трговска размена надмина една милијарда евра и тоа дека Северна Македонија го зголеми извозот за 40 проценти, додека Србија кај нас за 25 проценти.
„Тоа се должи на исклучително добрите политички односи, меѓутоа и на регионалната соработка особено истакната преку иницијативата ‘Отворен Балкан’“,
рече премиерот.
Тоа, според Ковачевски, е практична имплементација на четирите европски слободи за слободно движење на производи, услуги, луѓе и капитал, но не претставува замена за европските интеграции, туку значи чекор за зачленување во ЕУ.
На средбата со Брнабиќ, како што информира, станало збор и за одржување трета заедничка владина седница, која би се одржала веднаш по формирањето на новата Влада во Србија и за иницијативата „Отворен Балкан“ и претстојниот самит во Охрид.
„Разговаравме за имплементацијата на веќе потпишаните меморандуми особено во делот на унапредувањето уште повеќе на слободното движење и на намалување на нетарифните бариери помеѓу државите, потоа намалување на одредени административни обврски кои во моментов постојат, но и на воведување на единствен дигитален ИД број за граѓаните на сите држави со што би се олеснило вработувањето од една во другите две држави. Тоа практично значи поголем достап на капитал на работна сила за инвеститорите“,
рече Ковачевски.
Премиерката на Србија Ана Брнабиќ, истакнувајќи дека пред нас се времиња полни со предизвици, на граѓаните на државава им порача дека Србија ќе остане сигурен и стабилен партнер на кого ќе можете да сметаат во најтешките моменти и во иднина.
Брнабиќ нагласи дека Србија искрено ја поддржува РС Македонија на нејзиниот европски пат.
„Дури и во разговорите за нашето приклучување во ЕУ секогаш им укажуваме на нашите европски партнери од колкаво значење е за целиот регион да се забрзаат евроинтеграциските процеси на Албанија и на С Македонија бидејќи тоа ќе даде позитивен сигнал за развој на целиот регион на Западен Балкан“,
изјави Брнабиќ.
Таа најави дека во скоро време ќе се одржи заедничка седница на двете влади без оглед на тоа кога ќе се формира новата Влада во Србија, потенцирајќи дека тоа ќе биде Влада на континуитет во однос на соработката со Северна Македонија што ќе продолжи на истиот тој пат на одлична економска и политичка соработка.
Само лани, информира Брнабиќ, трговската размена меѓу двете држави е од над една милијарда евра, а Србија е третиот најважен трговски партнер на Северна Македонија после Германија и Велика Британија. Северна Македонија е во првите 10 земји каде најмногу извезувала Србија лани во износ 815 милиони евра.
Премиерката Брнабиќ истакна дека Северна Македонија е еден од најблиските политички и економски партнери на Република Србија и во тој контекст ја спомена иницијативата„ Отворен Балкан“ чија цел е подобрување на економите и животниот стандард на нејзините членки. Наведе дека таа се базира на четирите основни слободи на ЕУ врз кои е формирана и тоа слобода на движење на луѓе, стоки, капитал и услуги.
Брнабиќ денеска во Скопје не сакаше да ги коментира односите и разговорите за црковните прашања меѓу Српската православна црква и МПЦ – Охридска архиепископија, но им се заблагодари на СПЦ и на српскиот патријарх Порфириј, затоа што, како што оцени, се обидуваат да решат прашања што придонесуваат за регионална соработка, разбирање и поврзување.
„Јас како претседателка на Владата не можам да говорам за црковни прашања и не можам да ги коментирам одлуките на Српската православна црква. Сепак, сакам да кажам дека чувствувам голема благодарност кон СПЦ и неговата светост патријархот Порфириј за тоа што во еден отворен разговор и дијалог се обидуваат да решат некои прашања и со тоа директно да придонесат за регионалната стабилност, разбирање и поврзување и, се враќам повторно на тоа, поинаква иднина, што е одговорност на сите и нас и денес сите треба да работиме на тоа“,
рече Брнабиќ.
Двајцата премиери претпладнево учествуваа на самитот „Македонија 2025“, на кој на панелот „Градење просперитетна иднина: Улогата на регионалната соработка“, по обраќањата одговараа и на прашања за предизвиците со кои се соочува регионот и за значењето на иницијативата „Отворен Балкан“.