Агенцијата за храна и ветеринарство ги објави препораките што треба да ги преземат рестораните во однос на безбедноста во услови на пандемија, по 19 мај, од кога според најавите од Комисијата за заразни болести ќе почнат со работа некои од рестораните
Темелна дезинфекција на објектите и површините и опремата, дезинсекција и дератизација во угостителските објекти, спроведување на строги мерки за избегнување на евентуален пренос на инфекцијата меѓу вработените и гостите, преку контаминиран прибор и опремата која доаѓа во контакт со храната и гостите, како и мерки за избегнување на пренос на инфекцијата при прием на храната и послужувањето на гостите, се дел од мерките кои Агенцијата за храна и ветеринарство и препорачува до сопствениците на угостителските објекти, по најавите од Комисијата за заразни болести дека рестораните ќе почнат со работа во втората фаза од воведувањето на релаксираните мерки, која согласно трендот на новозаболени од корона вирусот, се очекува да биде после 19 мај.
„Примарна останува, потенцираат, примена на мерките за лична заштита како што се носењето на заштитна маска од страна на вработените, одржување на хигиена на рацете, физичко дистанцирање од 1,5 – 2 метри меѓу самите вработени и со гостите, но пред се избегнување на допирање на очите, носот и устата“,
се наведува во соопштението од АХВ.
Понатаму, задолжителна ќе биде дезинфекцијата на рацете и на гостите и на вработените кои тоа треба да го практикуваат почесто, односно во неколку наврати во текот на подготовката и послужувањето на храната, а за вработените треба да се обезбеди и дополнителна заштитна опрема, како што се штитови за лице, водонепропустливи престилки, гумени ракавици и чизми.
Секоја од масите треба да биде максимум за четири гости кои ќе бидат сместени на површина од 10 квадратни метри, растојанието од задниот дел од столицата до задниот дел од столицата на соседната маса треба да изнесува најмалку еден метар, а гостите да се гледаат едни со други на растојание од најмалку 1, 5 метар. Во помалите објекти, треба да се разгледа и можноста за шалтерско послужување.
Сите препораки и информации кои се однесуваат на пандемијата и на безбедноста на храната и здравствената заштита на животните може да се прочитаат на интернет страницата на АХВ.