Премиерот очекува железничкиот тунел да биде заеднички проект со Бугарија финансиран од ЕУ

Според него, со средбата се покажува оти можеме да изградиме консензус кога станува збор за прашања од заеднички интерес

Премиерот Христијан Мицкоски ја оцени како исклучително успешна средбата што вчера се одржа во Брисел меѓу македонската и бугарската делегација, а на која се разговараше за завршување на прекуграничните делови и заедничкиот тунел од железничкиот Коридор 8.

Одговарајќи на новинарско прашање за тоа кои се следните чекори, посочи дека е задоволен што сме покажале оти можеме да изградиме консензус кога станува збор за прашања од заеднички интерес.

„Очекувам овие средби да резултираат со тоа, ние да ја завршиме делницата од пругата Коридорот 8 од Крива Паланка до влезот на тунелот, од излезот на тунелот до приклучување со постоечката пруга, тоа се два или три километри, за што треба да се направи проект и тоа да го направи Бугарија како држава, вклучително и модернизација на целокупната пруга Ѓуешево до Софија. А тунелот да биде заеднички проект, што ќе биде финансиран од Европската Унија“,

рече тој.

Нов тендер за третата делница од пругата кон Бугарија до крајот на годината, договорено на средба во Брисел

Како што денеска информира Министерството за транспорт, на состанокот во Брисел се договорија чекорите во следните месеци, а меѓу приоритетите е повторно објавување на тендерот за работите на железничкиот дел меѓу Крива Паланка и влезот на прекуграничниот тунел до крајот на 2025 година од страна на Македонија.

За заедничкиот проект за изградба на прекуграничниот тунел меѓу Ѓуешево и Деве Баир, двете страни се договорија да формираат работни групи што до крајот на јули ќе го финализираат текстот на меѓувладиниот договор со цел да се утврдат конкретните обврски на двете страни на техничките, финансиските, градежните и оперативните аспекти.

„Се разговараше за содржината и потпишувањето на Договорот за оваа есен, со што би се отворил патот за отпочнување градежни работи на почетокот на 2026 година. Двете страни се согласија да продолжат со активностите за изградба на прекуграничниот тунел доставен од страна на Македонија“,

се вели во соопштението од Транспорт.

На средбата е договорено двете страни да ги истражат најсоодветните можности за заедничко аплицирање за финансирање од Европската Унија или од партнерските финансиски институции за заедничка изградба на тунелот.