Премиерот на Украина, Oлексиј Гончарук, поднесе оставка на функцијата.
Од кабинетот на претседателот Володимир Зеленски соопштија дека оставката дополнително ќе биде разгледана.
Гончарук оставката ја објави утринава на својата фејсбук-страница, а следува два дена откако во јавноста се појавија аудиоснимки на кои се слуша неговиот глас за време на состаноци со неколку министри, во кои тој ги насочува како да зборуваат за економијата со претседателот кој, како што вели, „не ги разбира економските работи“.
Гончарук во оставката објаснува дека снимките се монтирани делови од неколку владини состаноци, чија цел е да создадат впечаток дека неговиот тим не го почитува претседателот Зеленски.
Триесет и петгодишниот Гончарук беше премиер од август лани и беше избран по парламентарните избори во јули 2019-та. Тој беше најмладиот премиер на Украина во историјата.