По светските премиери во Њујорк и во Лондон, скопската публика ќе има можност да го погледне делото кое веќе е откупено за дистрибуција од светскиот гигант „Нешнл џиографик“ (National Geographic)
Македонскиот кандидат за наградата „Оскар“, документарниот филм „Приказната за Силјан“ на режисерката Тамара Котевска, на четврти јануари (недела) ќе ја доживее својата свечена премиера пред домашната публика. Настанот ќе се одржи во Македонскиот народен театар (МНТ) со почеток во 20:30 часот, со што оваа институција по првпат ќе биде домаќин на кинопромоција од ваков формат.
На премиерата е најавено присуството на целата филмска екипа што стои зад ова остварување, кое се вбројува меѓу најуспешните во македонската кинематографија. По светските премиери во Њујорк и во Лондон, скопската публика конечно ќе има можност да го погледне делото кое веќе е откупено за дистрибуција од светскиот гигант „Нешнл џиографик“ (National Geographic).
Филмот веќе ги освои симпатиите на меѓународната критика и собра низа награди на релевантните филмски фестивали. Светските критичари го опишуваат како триумф и апсолутен шармер, нагласувајќи ја неговата прекрасна и нежна меланхолија деликатно поврзана со екосистемот.
Во фокусот на оваа визуелно силна приказна е Никола, земјоделец од рурална Македонија, кој, соочен со притисокот на модерното живеење и новите државни политики, наоѓа ранет бел штрк на депонија. Нивниот однос, граден врз меѓусебна доверба, прераснува во медитативно патување за издржливоста и врските меѓу човекот, заедницата и природата.
Новиот филм на Котевска доаѓа по огромниот успех на „Медена земја“ (Honeyland), кој во 2020 година испиша историја со две номинации за „Оскар“. Со „Приказната за Силјан“, Котевска продолжува да ги истражува темите на маргинализираните поединци и нивниот соживот со природата, позиционирајќи го македонскиот документарен филм на самиот врв на светската кинематографија.
Потврдата од „Нешнл џиографик“ за откуп на филмот дополнително ја засилува неговата видливост на американскиот и на светскиот пазар во пресрет на финалните селекции за најпрестижните филмски награди.
Билетите ќе бидат пуштени во продажба во понеделник, 29 декември, преку платформата drugastrana.mk. По празниците филмот ќе продолжи да се прикажува во Скопје и низ другите градови.