Министерот за здравство Венко Филипче вели дека земјата аплицирала за да ги добие првите дози на вакцината против ковид-19 преку механизмот Ковакс. Според него, првата пратка може да се очекува кон крајот на месецов или почетокот на февруари.
„Вчера стигна писмото за најава од страна на механизмот Ковакс дека е можно вакцините да стигнат на крајот на јануари или на почетокот на февруари. Ние аплициравме со сите документи во однос на подготвеноста на нашиот систем и, практично, веќе аплициравме да бидеме во првата група земји во однос на чување на температура на минус 70 степени, дистрибуцијата и практичната апликација преку здравствените домови. Крајниот рок за апликацијата е 18 јануари и потоа останува да видиме кога точно би пристигнала пратката. Според нивното писмо, станува збор за вакцината ‘Фајзер’, а следна што доаѓа предвид е вакцината ‘Астразененка’“,
вели Филипче.
Преку три механизми по 800 илјади дози вакцини
Министерот соопшти и дека државата очекува преку три механизми да добие по 800 илјади дози на вакцините, што би било доволно за да се создаде колективен имунитет.
„По три механизми по 800 илјади дози за 400 илјади граѓани. Значи вкупно милион и двесте илјади граѓани, близу 60 проценти од населението, тоа е предвидување за колективен имунитет. И така се предвидувањата во сите други земји. 833 илјади дози преку механизмот Ковакс, 800 илјади дози преку директната спогодба со ‘Фајзер’ и 800 илјади дози со кои веќе аплициравме и добивме поддршка од канцеларијата на Делегацијата на ЕУ кај нас“,
рече Филипче при денешната посета на Универзитетската клиника за гинекологија и акушерство-Скопје.