Според пишувањата на „Гардијан“, постојат спротивставени извештаи за тоа дали иранската делегација, во која ќе бидат претседателот на парламентот Мохамед Багер Галибаф и министерот за надворешни работи Абас Арагчи, заминала за Исламабад
Преговорите што викендов треба да се одржат меѓу Иран и САД во Исламабад се решавачки за постигнување трајно примирје, изјави пакистанскиот премиер Шехбаз Шариф, чија земја посредува меѓу Иран и САД за деесклација на војната и постигнување договор за мир.
Шариф во телевизиско обраќање рече дека ова е момент на одлучување и побара народот да се моли овие разговори да бидат успешни за да се спасат безброј животи и светот да види мир.
Тој рече дека „со Божја волја“ преговарачи од САД и Иран ќе бидат присутни на разговорите во Исламабад во сабота, додавајќи дека посредништвото во разговорите е „не само горд момент за Пакистан, туку и за целиот муслимански свет“.
Потпретседателот на САД, Џеј-Ди Венс, ќе биде дел од преговарачкиот тим во Пакистан. Тој на заминувањето кон Исламабад рече дека „се радува“ на разговорите и очекува тие да бидат позитивни, иако го предупреди Иран да не „игра“ со САД.
Според пишувањата на „Гардијан“, постојат спротивставени извештаи за тоа дали иранската делегација, во која ќе бидат претседателот на парламентот Мохамед Багер Галибаф и министерот за надворешни работи Абас Арагчи, заминала за Исламабад.
Галибаф претходно изјави дека две претходно договорени мерки, прекин на огнот во Либан и ослободување на блокираните средства на Иран, мора да се спроведат пред да започнат преговорите.
Two of the measures mutually agreed upon between the parties have yet to be implemented: a ceasefire in Lebanon and the release of Iran’s blocked assets prior to the commencement of negotiations.
— محمدباقر قالیباف | MB Ghalibaf (@mb_ghalibaf) April 10, 2026
These two matters must be fulfilled before negotiations begin.
Кратко откако потпретседателот Џеј-Ди Венс замина за Исламабад, каде што ќе му се придружат специјалниот пратеник Стив Виткоф и Џаред Кушнер, за да преговараат за конечен мир по двонеделното примирје постигнато во вторникот, американскиот претседател најави дека американските воени бродови се преполнуваат со оружје за да го нападнат Иран ако преговорите во Пакистан не успеат да доведат до договор.