Според анкетите, Социјалдемократската партија на актуелната премиерка Мете Фредериксен е во предност пред десничарите, но на овие избори би можела да ги забележи најслабите резултати за повеќе од еден век, што би можело да го закомплицира формирањето влада
Данците денеска гласаат на предвремени парламентарни избори кои премиерката Мете Фредериксен ги распиша порано од планираното, во обид да ја искористи поддршката за нејзиното силно противење на напорите на американскиот претседател Доналд Трамп да го преземе Гренланд.
Околу 4,3 милиони Данци со право на глас ќе избираат 179 членови на Фолкетингот (парламентот на Данска), вклучувајќи двајца од Гренланд. Изборите беа распишани на 26 февруари, седум месеци пред предвиденото.
Фредериксен, која е на власт од 2019 година, се бори за трет мандат под слоганот „Безбедно во неизвесни времиња“, ставајќи посебен акцент на одбраната и стабилноста.
Според последните анкети, Социјалдемократската партија на Фредериксен е во предност пред десничарите, но на овие избори би можела да ги забележи најслабите резултати за повеќе од еден век, што подоцна би можело да го закомплицира формирањето влада.
Гласањето трае до 20 часот, а првите резултати се очекуваат вечерва.