Во однос на борбата против корупцијата, Филипче кажа дека таа може да биде вистинска само ако има реформи во правосудниот систем, и ако има контрола од европските правосудни институции, притоа споменувајќи ја европската обвинителка Лаура Ковеши
Лидерот на Социјалдемократскиот сојуз на Македонија (СДСМ), Венко Филипче, во вечерашното гостување во емисијата „Клик пулс“ на ТВ 21 изјави дека очекува да се случат предвремени парламентарни избори, бидејќи, како што оцени, актуелната власт ќе се соочи со сериозни политички и економски предизвици.
И покрај јавните изјави на лидерот на ВМРО-ДПМНЕ и премиер, Христијан Мицкоски, дека нема да има предвремени избори, претседателот на СДСМ е убеден дека тие ќе се случат.
Како аргументи дека тоа е извесно, тој ја наведе состојбата со буџетот, која според него е сериозна, со зголемен дефицит, поради што има притисок врз исплатата на плати и обврски кон фондовите, а прашањето за обезбедување средства станува сè поактуелно. Тој оцени дека се земаат нови заеми со непознати услови, што дополнително ја зголемува финансиската неизвесност.
Филипче предупреди и дека незадоволството кај граѓаните ќе расте, особено во услови на економски притисок и најавени протести од синдикатите.
„Предвремени избори не само што ќе има, туку нема да знаат каде да избегаат претставниците на власта од проблемите во коишто ќе се најдат заради нивните погрешни политики. Прво толкава е ‘дупката’ во буџетот, поради што во прашање е доведена исплатата на пензиите и на платите. Од каде ќе најдат пари. Еве, сè некои нови заеми со непознати камати се замаат од којзнае каде. Значи незадволството ќе расте. Еве, што прави Владата за да ги спречи протестите коишто ги најавија синдикатите. Ништо не прават, и ќе се соочат со револт“,
рече лидерот на СДСМ.
Говорејќи за актуелната криза на Блискиот Исток, тој посочи дека токму ваквите случувања покажуваат колкаво е значењето на одлуките што ги донела претходната влада на СДСМ, со кои Македонија станала членка на НАТО, што, како што кажа, е најсилниот штит за државата.
„Конечно е јасно во ситуација кога има кризи на повеќе места во светот што значеле државничките и визионерски би рекол политики на СДСМ во минатото. Кога сме дале политичка жртва по цена на сопствениот политички рејтинг да се донесат тешки одлуки, но сме станале земја членка на НАТО. Дел сме од најсилниот одбранбен сојуз во светот“,
рече Филипче.
Во интервјуто, Филипче нагласи дека граѓаните треба внимателно да ги следат и оценуваат политичките ставови и кредибилитетот на политичарите, потсетувајќи на несполнетите ветувања на премиерот Мицкоски меѓу кои и оние за поништување на Преспанскиот договор и за враќање на старото име на државата.
„Што значи тоа, прво дека не може да му се верува односно дека и тогаш не ја кажувал вистината, граѓаните мораат знаат што е аргументирано издржано, а што не е и затоа сакам да ги потсетам дека премиерот и ВМРО-ДПМНЕ заедно со коалицијата со ЗНАМ дојдоа на власт со една лажна националистичка кампања и реторика“,
кажа лидерот на СДСМ.
Во однос на борбата против корупцијата, Филипче кажа дека таа може да биде вистинска само ако има реформи во правосудниот систем, и ако има контрола од европските правосудни институции, притоа споменувајќи ја европската обвинителка Лаура Ковеши.
„Вистинска правда ќе има не со ваква партизација, туку тогаш кога ќе дојдат европските правосудни институции, на чело со европското обвинителство и обвинителката Лаура Ковеши, за која гледаме какви постапки води кон официјални лица во земјите членки на Европската Унија, еве најсвежите во Хрватска, во Бугарија итн. Тоа нашите луѓе сакаат да го видат…„Јас не заговарам странци, јас заговарам да има реформа во системот и да има присутни европски институции. Реформите во правосудството ќе придонесат тука да бидат присутни и европските правосудни органи“,
рече тој.