Полскиот министер за надворешни работи како најголема опасност за воена ескалација ја гледа Украина, каде што Русија веќе распореди голем број воени сили
Европа е поблиску до војна повеќе од кога било во последните 30 години, предупредува полскиот министер за надворешни работи Збигњев Рау, во текот на третата рунда од дипломатските преговори оваа недела кои имаат за цел да ги смират тензиите околу руското барање на Украина никогаш да не ѝ биде дозволено да му се приклучи на НАТО, пренесува „Ројтерс“.
Рау, на пресот за новинарите по обраќањето на состанокот на ОБСЕ, изјави дека оваа закана е предизвик за сите 57 членки на оваа организација бидејќи нив ги поврзуваат исти принципи на суверенитет и територијален интегритет во рамките на меѓународно признатите граници.
„Се чини дека ризикот од војна на подрачјето на ОБСЕ е поголем од кога било во изминатите 30 години“,
изјави тој во говорот во кој ги изложи приоритетите на својата земја.
Тој истакна дека ОБСЕ е најдобра организација за надминување на конфликти, иако се водат билатерални разговори САД-Русија, и Советот на НАТО со Русија. Рау се изјаснил за обновување на дијалогот, но рекол дека консензус може да се постигне само со почитување на меѓународните права, пренесува „Танјуг“.
„Веќе неколку недели сме соочени со перспективата за голема воена ескалација во Источна Европа“,
истакна тој.
Тој вели дека опасност од најсериозен конфликт моментално постои во Украина и дека неговата прва посета во функцијата на претседателството со ОБСЕ ќе биде токму во таа земја.