Имајќи ги предвид доказите депонирани во Апелацискиот суд во Гостивар, се очекува конечната одлука да биде во наша корист и партијата заедно со печатите да остане кај нејзиниот легитимен претседател, велат од крилото на Таравари
Потпретседателот на партијата од крилото на Села, Кренар Лога обвинува за притисоци од страна на Таравари, нарекувајќи ги поранешните сопартијци квислинзи
Апелацискиот суд во Гостивар го врати на повторно судење предметот за политичката партија Алијанса за Албанците, информира Арбен Таравари, посочувајќи оти Судот му ги прифатил жалбите кои тој ги поднесе откако Основниот суд Тетово во април годинава пресуди дека Зијадин Села ќе ги добие партиските печати.
„Апелациониот суд го враќа предметот на повторно судење по претходната одлука донесенс од Основниот суд Тетово, каде што се одолговлекуваше и се менуваа неколку судии додека не се донесе скандалозната одлука под притисок на поранешниот министер за правда Кренар Лога, партиските печати да и припаднат на фракцијата што и се придружи на ДУИ“,
соопшти Таравари.
Имајќи ги предвид доказите депонирани во Апелацискиот суд во Гостивар, се очекува конечната одлука да биде во наша корист и партијата заедно со печатите да остане кај нејзиниот легитимен претседател, велат од крилото на Таравари.
Експресна реакција за одлуката на Апелациониот суд пристигна од поранешниот министер за правда, Кренар Лога од крилото на Зијадин Села, кој беше обвинет од Таравари дека правел притисок за да се донесе претходната одлука. Лога обвинува дека токму министерот за здравство е тој што прави притисоци, нарекувајќи го крилото на Таравари – „Алијанса за услуги на Мицкоски“.
„И по притисокот на Таравари и неговиот газда, тој не го добил предметот за „печатите на АА“. АУМ – Алијанса за услуги на Мицкоски би било во право да се нарече новиот субјект по разделбата од нашата партија. 100 дена владеење со ВМРО-ДПМНЕ се докажала како квислиншката активност во секоја секунда. П.С – и во Апелациониот суд во Гостивар сменета е судијката, ама… нема врска друже, не спомнувај бидејќи во наша корист“,
напиша Лога.
Во април годинава, Основниот суд во Тетово каде што беше поведена постапка за да се одлучи кој ќе има право да ја води Алијанса за Албанците, откако настана поделба на две крила, едното на Зијадин Села и другото на Арбен Таравари, донесе одлука партиските печати да му припаднат на Села, по што крилото на Таравари поднесе жалба.
Алијанса за Албанците доживеа раскол откако лидерот Арбен Таравари ги повика партиските тела да го поддржат во одлуката за заеднички изборен настап со опозициските партии на Албанците. На ваквиот повик се спротивстави Зијадин Села од позиција на претседател на Централното собрание со ставот дека партиските тела веќе донеле одлука Алијанса за Албанците да оди сама на претстојните избори.
По расколот, Арбен Таравари и опозициските партии на Албанците ја потврдија коалицијата и потпишаа декларација за обединување на изборите.
Крилото на Алијанса за Албанците (АА) предводено од Зијадин Села, на седница на Централното собрание на партијата, донесе одлука на изборите да се приклучи на „Европскиот фронт“ предводен од Демократската унија за интеграција (ДУИ).