Проектот за брз автобуски превоз опфаќа две линии, а првата транша од заемот би се користела за финансирање на линија 1 со која трамвајот на тркала треба да биде во патен правец исток-центар-запад Ново Лисиче – Ѓорче Петров), додека втората транша за линија 2 односно југ-центар-север (Кисела Вода – Бутел)
Откако го помина филтерот во Комисијата за финансирање и буџет, предлог-законот кој предвидува задолжување со заем од 70 000 000 евра кај Европската банка за обнова и развој (ЕБОР) за финансирање на проектот „Воведување на брз автобуски превоз во Град Скопје“ се најде на дневен ред на пленарна седница пред пратениците.
Пратениците од опозициската ВМРО-ДПМНЕ сметаа дека со ова задолжување од 70 милини евра ќе се финансира нереален проект, што треба да биде завршен во 2027 година, како и дека се зема заем неколку месеци пред одржувањето на локалните избори. Пратеничката Дафина Стојановска, покрај за овој проект зборуваше и за работата на градоначалникот на Скопје, Петре Шилегов, нарекувајќи го најнеспособниот прв човек не само на Скопје туку и на другите градови и рурални општини.
Опозицијата обвини и дека градоначалниците од СДСМ немаат никакви резултати, па сега бараат задолжувања.
Координаторот на пратеничката група на СДСМ, Јован Митревски, пак, во дебата рече дека на ВМРО-ДПМНЕ ѝ смета Петре Шилегов и им порача оти се надева дека нема да избегаат од локалните избори.
Диме Велковски, исто така од редовите на социјалдемократите, ги праша пратениците од опозицијата дали вакво нешто му е потребно на Скопје и потенцираше дека оценка и на невладиниот сектор е оти брз автобуски превоз му треба на Скопје, како и дека за ова имало дебати и заклучокот бил дека ова е најдобро решение за главниот град.
Седницата на чиј дневен ред е и заемот за брзиот автобуски превоз во Скопје, треба да продолжи утре.
Предлог-законот предвидува заемот од 70 милиони евра од ЕБОР да се додели во две транши. Првата во износ од 47 600 000 евра, а втората од 22 400 000.
„Рокот за отплата на првата транша од заемот е 15 години со вклучен грејс период од четири години. Првата транша од заемот ќе се отплаќа во 22 полугодишни рати на 20 април и на 20 октомври секоја година, започнувајќи од првиот датум од навршување на четвртата година од склучување на Договорот за заем. Рокот за отплата на втората транша од заемот е 15 години со вклучен грејс период од четири години. Втората транша од заемот ќе се отплаќа во 22 полугодишни рати на 20 април и на 20 октомври секоја година, започнувајќи од првиот датум од навршување на четвртата година од денот на достапноста за користење на втората транша“,
пишува во предлог-законот.
Проектот за брз автобуски превоз опфаќа две линии, а првата транша би се користела за финансирање на линија 1 со која трамвајот на тркала треба да биде во патен правец исток-центар-запад Ново Лисиче – Ѓорче Петров), додека втората транша за линија 2 односно југ-центар-север (Кисела Вода – Бутел).
Што понатаму?
Откако ќе се донесе предлог-законот, како што посочија од Град Скопје пред десетина дена, следен чекор ќе биде потпишување на договор за заем на кредитот за ЕБОР за изведба на двете линии.
Градските власти засега не прецизираат рокови и нагласуваат дека динамиката на постапката понатаму ќе зависи од Европската банка.
„Целата понатамошна постапка, поточно распишувањето на огласот за избор на проектант за изработката на основниот проект и целокупната пропратна документација за првата линија од БРТ Скопје, ќе го спроведува ЕБОР. Земајќи го предвид претходното, распишувањето на огласот, тендерската документација евалуација и понатамошната постапка, пред сè зависи од динамиката која ќе ја предложи и спроведе ЕБОР“,
одговорија од Град Скопје на прашањата на „360 степени“.
Идејниот проект за трамвајот на тркала од Ѓорче Петров до Ново Лисиче во моментов е во фаза на изработка и во наредниов период Град Скопје очекува да ја добие документацијата.
Детали за тоа што бараа градските власти да биде опфатено во проектот прочитајте ТУКА.