Комисијата бара мерките за јавниот сектор да стапат во сила 10 дена од донесувањето на одлуката на владина седница, а задолжителната вакцинација за здравствените работници да стапи во сила по 30 дена
Покрај рестрикциите, Комисијата за заразни болести бара инспекторатите и МВР да го ажурираат системот за контрола и да се користат електронските алатки, односно апликациите за верификација на сертификатите со цел да се спречи користењето фалсификати
Нови мерки за невакцинираните граѓани денеска предложи Комисијата за заразни болести, а меѓу нив е задолжителна вакцинација за здравствените работници, додека за вработените во јавниот сектор да биде неопходна потврда за примена една доза вакцина, ПЦР-тест или прележан ковид.
Предлозите на Комисијата ги соопшти министерот за здравство Венко Филипче кој рече дека тие се донесени со консензус од членовите.
Исто така, како опција за вработените е и потврда од специјалист дека лицето не може да се вакцинира.
„Одлучивме да предложиме на седница на Влада сите вработени во јавниот сектор, во локалната самоуправа и сите институции под овие владини институции, за одење на работно место да прикажат потврда за најмалку една примена вакцина или да имаат негативен ПЦР-тест кој ќе важи најмалку 72 часа, а ќе биде направен на сопствен трошок, или да имаат потврдат за прележан ковид не постар од 45 дена или да имаат потврда од специјалист дека не може да ја примаат вакцината, а тоа се едни од тие ретки имунолошки состојби за што ние ќе излеземе со соодветна листа на болести и специјалисти кои може да ги издаваат тие потврди“,
рече Филипче.
Предлогот е овие мерки да стапат во сила 10 дена откако ќе бидат усвоени на следната владина седница, а препорака е овие мерки да се воведат и во приватниот сектор.
„Препорачуваме до овие мерки да се придржуваат и приватните компании, од кои веќе имаме потврда, и очекуваме дека ќе може да се приклучат со оглед на тоа што од Сојузот на стопански комори стигна едно писмо со слични барања, а со цел да се заштитат производствените капацитети и целокупниот производствена процес во земјата“,
рече Филипче.
Втората мерка – задолжителна вакцинација за здравствените работници се препорачува да стапи во сила 30 дена откако ќе ја донесе Владата со цел да им се даде простор на оние 20-30 отсто невакцинирани здравствени работници да ја примаат вакцината.
Кој ќе контролира и што ќе се случи со здравствените работници кои нема да се вакцинираат
Во однос на новите мерки, министерот рече дека ќе Комисијата за заразни болести ќе препорача во институциите да се назначи одговорно лице кое ќе ја прави контролата на самиот влез.
Во однос на здравствените работници, пак, за кои вакцинацијата е задолжителна, засега не се знае што ќе се случи ако одбијат да примат вакцина.
„Тие нови казнени мерки кои ќе се однесуваат и на физичките и на правните лица ќе ги дискутираме на седница на штабот и на следната владина седница. Ние се задржавме и ги дискутиравме овие аспекти од епидемиологијата и делот на менаџмент на болниците“,
рече Филипче.
Сепак, Филипче верува дека ќе има одзив и сите ќе прифатат да се вакцинираат. Токму невакцинираните, вели тој, ги преоптоваруваат болниците, а мора да се мисли и на другите пациенти, не само на заболените од ковид.
„Ова е една мерка со која сметам дека значајно ќе се зголеми опфатот со вакцинација, во овој момент по оној мини пик што го имавме пред неколку дена кога се преполнија сите активни ковид-центри во Скопје, ситуацијата делумно спласна, но пред нас е зимска сезона, сезона на грипови и на настинки, а и има пациенти кои заболуваат и од други болести, не може да се занимаваме само со ковид, мора да мислиме и на другите пациенти. Верувам дека оваа мерка ќе го зголеми опфатот со вакцинација и ќе се намали бројот на заболени од ковид, во овој момент тие пациенти ги преоптоваруваат болниците, а невакцинираните се близу 80 проценти од вкупниот број ковид-пациенти“,
изјави Филипче.
Построга контрола – да се користат електронските алатки
Покрај рестрикциите, Комисијата за заразни болести бара инспекторатите и Министерството за внатрешни работи (МВР) да го ажурираат системот за контрола и да се користат електронските алатки, односно апликациите за верификација на сертификатите со цел да се спречи користењето фалсификати.
„Бараме да се ажурира и процесот на контрола од страна на сите инспекторати и МВР бараме да се ажурира. Имаме електронски алатки, не се само хартиените сертификати туку и европските сертификати може да ги симнат сите граѓани кои користат таков тип мобилни телефони. Има апликација која го прикажува соодветниот кју-ар код и има апликација која ја контролира валидноста на тој код, што значи дека се елиминира можноста да имаме фалсификувани сертификати“,
рече Филипче.