Неспроведени задолжителни здравствени прегледи на вработените лица, неусогласености во однос на хигиенските и микробиолошките барања за безбедност на храна и вода и нерегистрирани правни лица како оператори со храна биле главните неправилности што ги утврдиле екипите на АХВ при спроведените контроли и надзори
Екипи на Агенцијата за храна и ветеринарство (АХВ) во пресрет на новогодишните и божиќните празници извршиле повеќе контроли во оператори со храна и одговорни лица во нив, при што, покрај изречените парични казни, се уништени и над 624 килограми небезбедна храна, од кои 567 килограми производи од месо.
При спроведените контроли и утврдените недоследности, како што соопштија попладнево од АХВ, биле изречени вкупно 60 парични казни во вредност од над 33 000 евра во денарска противвредност.
„Во пресрет на новогодишните и божиќните празници, инспекциските служби на АХВ, со цел обезбедување на висок степен на заштита на здравјето на потрошувачите, покрај редовните, спроведува и засилени, вонредни контроли кај сите оператори со храна“,
се вели во соопштението од Агенцијата.
Акцент во контролите, како што посочуваат оттаму, бил ставен кај операторите што организираат предновогодишни и новогодишни прослави, како и во месарници, месарници со работилница, рибарници и други специјализирани продавници за храна од животинско потекло, поради зголемената побарувачка на ваков вид храна за време на празничниот период.
Според АХВ, контролите биле спроведени на територијата на целата држава. Биле извршени 423 надзори во гостилници и ресторани, како и 228 вонредни контроли кај оператори со храна од животинско потекло.
Неспроведени задолжителни здравствени прегледи на вработените лица, неусогласености во однос на хигиенските и микробиолошките барања за безбедност на храна и вода и нерегистрирани правни лица како оператори со храна биле главните неправилности што ги утврдиле екипите на АХВ при спроведените контроли и надзори.
„Кај неколку оператори најдена е небезбедна храна и храна со поминат рок, утврдено е несоодветно складирање и селектирање на храна, нередовно ажурирање на записите за Добра хигиенска и производствена пракса и HACCP, неспроведена дезинфекција, дезинсекција и дератизација во објектите, како и неземени мостри од храна за лабораториско тестирање, производи без декларации и со нецелосни и нејасни декларации и други помали недоследности, за што се издадени соодветни решенија“,
велат од АХВ.
Од Агенцијата апелираа, во пресрет на новогодишните празници да се купува храна од одобрени и регистрирани објекти што ги имаат имплементирано системите за безбедност на храната, да се внимава на означувањето на производите, како и на тоа каде се чуваат.
„Во домаќинствата важно е да се внимава на хигиената, подготовката на храната и нејзино чување на соодветна температура“,
потсетуваат од АХВ.