„Законот е готов и откако ќе се добие сублимат и став од Венецијанската комисија ќе се најде пред пратениците“, рече министерот за јавна администрација
Не е коректно за ново законско и суштинско решение да се прејудицира дека нема своја употреба, рече денеска министерот за јавна администрација Горан Минчев од собраниската говорница одговарајќи на пратеничко прашање од пратеникот од „Европски фронт“, Елми Азири, кој посочи дека предлог-законот за правична застапеност има недостатоци, не е ставен на увид пред пратениците, но и дека нема да помине во онаа форма во која Владата го предлага.
„Законот е готов и откако ќе се добие сублимат и став од Венецијанската комисија ќе се најде пред пратениците“,
рече Минчев.
Додаде и дека правичната застапеност ќе се регулира со подзаконски акти откако ќе се добие мислењето од Венецијанската комисија.
Според Минчев, алатката „балансер“ пред неговото преземање на функцијата во Министерството за јавна администрација не била според законските одредби, како и дека на седница на минатиот состав на Владата, Демократската унија за интеграција (ДУИ) констатирала дека „балансерот“ како алатка за правична застапеност се злоупотребува и има изминат рок.
„Правичната застапеност на етничките заедници е уставна категорија, согласно на Охридскиот рамковен договор. Од тоа нема бегање и тоа ќе се спроведува. Како Влада дадовме збор дека по укинувањето на ‘балансерот‘ од страна на Уставниот суд не треба да се брза со ново решение со цел да нема злоупотреби. Рековме дека ќе одиме полека и сериозно“,
рече Минчев на седницата за пратенички прашања.
Напомена дека во изработката на законот биле вклучени експерти по уставно право, за да се избегнат спротивставености со други закони.
Зборувајќи за методологијата што треба да биде содржана во законот, Минчев рече дека тежнеат да има реална застапеност на етничките заедници.
„Ние сме мултиетничко општество и тоа ќе го обезбедиме многу подобро од претходната владејачка гарнитура и ќе обезбедиме методолошки решенија како тоа најдобро да функционира“,
кажа тој.
Зијадин Села, лидерот на Алијанса за Албанците (АА), дел од „Европски фронт“ вчера рече дека оваа коалиција нема да го поддржи законот за правична застапеност бидејќи со законот се регулира само злоупотребата што му се правеше на „балансерот“.
Премиерот Христијан Мицкоски пред два дена на прес-конференција информира дека на владина седница е усвоен предлог-законот за соодветна и правична застапеност.
Според него, предлог-законот има јасна цел, администрацијата да биде вистински сервис за сите граѓани, изградена врз заслуги, знаење, професионалност и интегритет, согласно Уставот и Охридскиот рамковен договор.
Како што појасни, предлог-законот ќе биде доставен до Венецијанската комисија, а потоа ќе влезе во собраниска процедура.