Од партиите досега официјално не соопштија кого ќе поддржат од 14-те кандидати. Единствено е познато дека ВМРО-ДПМНЕ својата поддршка ја дава за Александар Даштевски за иден претседател на ДИК
Во Собранието денеска е закажана пленарна седница на чиј дневен ред една од точките е избор на членови на Државната изборна комисија (ДИК) бидејќи мандатот на актуелниот состав истекува на 15 јануари.
Седницата вчера ја закажа претседателот Талат Џафери откако претходно Комисијата за прашања за избори и именувања ја утврди листата од 14 кандидати, која тој ја испрати до партиите за тие да се изјаснат кого ќе поддржат.
Извесно е дека партиите тоа ќе го направат денеска претпладне. Пред пленарната ќе се одржи седница на комисијата на која се очекува да бидат соопштени имињата кои ќе ги поддржат партии за нови членови на ДИК.
Од партиите досега официјално не соопштија кого ќе поддржат од 14-те кандидати. Единствено е познато дека ВМРО-ДПМНЕ својата поддршка ја дава за Александар Даштевски за иден претседател на ДИК.
На дневен ред на пленарната седница е и избор на членовите на Комисијата за спречување и заштита од дискриминација. На пратениците претходно им беа доставени предлог-кандидати за состав на ова тело откако заврши постапката за нивен избор пред Комисијата за прашања на изборите и именувањата.