Пленарната седница на чиј дневен ред, меѓу другото, е и изборот на уставните судии треба да продолжи по паузата за ручек, односно во 15 часот
Откако вчера доцна попладне пратениците конечно го усвоија дневниот ред и ја започнаа 88. пленарна седница, во собранието денеска продолжи дебатата за избор на Фатмир Скендер и Татјана Васиќ-Бозаџиева за членови на Уставниот суд.
За време на расправата пратеничката од редовите на ВМРО-ДПМНЕ, Јадранка Поцкова, рече дека кандидатите за судии уште не влезени во Уставниот суд веќе партиски се „обојуваат“. Според Поцкова, постои лоша постапка во изборот на уставните судии, а како што рече, наместо квалитетот и капацитетот на кандидатот, поддршка се дава на партиски послушници и судии подобни на власта.
Таа се осврна на образованието и на работното искуство на кандидатот за уставен судија Фатмир Скендер, посочувајќи дека тој нема објавено трудови, книги и стручни трудови, туку дека само учествувал на стручни обуки на различни теми.
„Нема докторат и затоа неговото место не е во Уставниот суд“,
рече таа.
Поцкова направи споредба со кандидатите за уставни судии кои беа предложени од опозицијата и не добија поддршка од членовите на собраниска Комисија за прашања на изборите и именувањата. За нив посочи дека се истакнати правници, со докторати, со објавени дела, стручни трудови и книги, кои оставиле печат во правото и во правосудството.
„Тоа се Славо Климовски, Родна Живковска, Тодор Витларов“,
додаде Поцкова.
Реплицирајќи и на Поцкова, пратеникот Бејџан Иљас од Демократската партија на Турците на Македонија рече дека и во текот на вчерашниот ден во расправата за Фатмир Скендер како да се сака, како што рече, да се даде впечаток оти кандидатот е анонимен.
„Можеби досега не беше во центарот на вниманието на јавноста поради тоа што повеќе бил концентриран да ја врши совесно и професионално должноста. За неговата стручност веројатно треба да ги прашаме граѓаните кои имале потреба од неговата праведност“,
потенцира Иљас, додавајќи дека се доказ и се важни и оценките на Судскиот совет кои со години не се менувале, а секогаш бил оценуван со оцена „многу добар“.
Според пратениците од опозициската ВМРО-ДПМНЕ, одлуката со која се избрани уставните судии е незаконска.
Тие посочија на Извештајот на ЕК каде, како што велат, за избор и именување на уставен судија се бара стручност и компетентност, а не изборот да се заснова на политичка основа. Според нив, секој состав на Уставниот суд е се полош место подобар.
Пратениците од владејачкото мнозинство, пак, потенцираа дека ВМРО-ДПМНЕ не сакаат добро за државата и демократијата, не сакаат да функционира судството и зад себе имаат, како што велат, голем криминален багаж. Според нив, целта на ВМРО-ДПМНЕ е да предизвика општа криза во државата, како парламентарна криза, политичка криза, а сега сакаат да се предизвикаат и уставна криза.
Пратеникот Мартин Костовски од СДСМ рече дека како парламентарно мнозинство ќе направат се за да дојде до избор на уставни судии и да функционира државата.
Ако малку повеќе се следат активностите на турската заедница во земјава и турските медиуми, ќе се знае кој е Фатмир Скендер, порача пратеникот Енес Ибрахим од Партијата за движење на Турците. Фатмир Скендер, како што рече, не е избран судија од Никола Груевски или од страна на некој друг политичар, тој е избран за судија во 2014 година. Пратеникот истакна дека Скендер е правник, судија, активист за човекови права и додаде оти се борел за да се оствари правото за настава на турски јазик во земјава.
За време на расправата, координаторот на пратеничката група на ВМРО-ДПМНЕ Никола Мицевски рече дека најголем проблем е тоа што три дена во Собранието не слушнале од пратениците од владејачкото мозинство за постапката за избор на уставните судии.
Укажа дека собраниската Комисија за прашања на изборите и именувањата почнала на 7 јуни 2021 година и имало несогласувања за кандидатите за уставни судии, потоа имало застој до 13 август 2022 година или 10 месеци Комисијата не заседаваше, а предлози за уставни судии немаше.
„За денеска, во моментов додека го зборувам ова некој да држи прес-конференција во прес-центарот на Собранието и да каже нема да дозволам ВМРО-ДПМНЕ да предизвика уставна криза“,
рече Мицевски и ја обвини власта што 10 месеци на допис од Судски совет не се организирала да поднесе барање за уставни судии и што, како што рече, 10 месеци не работевме, не беше свикувана Комисијата од страна на власта.
Пленарната седница на чиј дневен ред, меѓу другото, е и изборот на уставните судии треба да продолжи по паузата за ручек, односно во 15 часот.