Меѓу клучните новини предвидени во предлог-законот за Судски совет се јавност во постапката за разрешување на претседателот на Советот, прецизирање на критериумите за избор на истакнат правник за член на ова тело, како и воведување јавна расправа при избор на кандидатите кои не се судски членови со цел поголема транспарентност
Со мнозинство од 65 гласа „за“, пратениците на денешната пленарна седница ја усвоија потребата од носењето на предлог-законот за Судски совет, објави попладнево министерот за правда Игор Филков. Предлог-законското решение сега се проследува на второ читање во парламентот.
Клучни новини кои се предвидени во предлог-законот за Судски совет се јавност во постапката за разрешување на претседателот на Советот, прецизирање на критериумите за избор на истакнат правник за член на ова тело, како и воведување јавна расправа при избор на кандидатите кои не се судски членови со цел поголема транспарентност.
Понатаму, се предвидува зајакнување на критериумите за избор, одговорност и разрешување на членови на Советот од редот на судиите, прецизирање на постапката за дисциплинска одговорност на судиите, но и на членовите на Судскиот совет, воспоставување обврска Советот да ги прецизира, индивидуализира и образложи одлуките за избор и утврдување одговорност на судиите. Новото законско решение предвидува и утврдување рокови и преземање дејствија за дисциплинска одговорност на судиите.
Министерот за правда Игор Филков од собраниската говорница порача дека новиот закон предвидува и многубројни други решенија за унапредување на целокупната правна рамка согласно препораките на Европската Унија.
„Со реформите што ги преземаме поставуваме основа за силен, независен и транспарентен судски совет, институција која ќе биде силен гарант за владеењето на правото и за довербата на граѓаните во судството“,
порача Филков од Собранието.
Тој додаде дека со овој закон во Министерството за правда започнува нова ера на работа и функционирање во која секој важен и суштински закон за граѓаните ќе се изготвува низ отворен, јавен и транспарентен процес.