За барањето за еднократна парична поддршка за семејствата на загинатите во Кочани, по примерот на оние што починаа во пожарот во модуларната болница во Тетово, Мицкоски не даде конкретен одговор, туку дека како влада секогаш правеле и ќе прават сè за да им помогнат
Премиерот Христијан Мицкоски смета дека прашањето за формирање собраниска анкетна комисија за истражувањата во врска со пожарот во кочанската дискотека треба да биде упатено до пратениците. Ова тој го кажа во одговор на новинарско прашање дали пратеничката група на ВМРО-ДПМНЕ ќе го поддржи барањето на роднините на загинатите во пожарот, пратениците да иницираат надзорна расправа и да се формира посебна анкетна комисија за целосно и независно испитување на случајот.
„Што се однесува за поддршката за анкетна комисија, мислам дека тоа прашање треба да го поставите на пратениците. Мислам дека ваков тип на соочување со јавноста многу скоро ќе биде кога ќе почне процесот во суд. Таму ќе можат сите, и граѓаните и јавноста да следат што сè се случувало“,
вели тој давајќи изјава за медиумите по поставувањето камен-темелник за изградба на нова детска градинка во Општина Гази Баба.
За барањето за еднократна парична поддршка за семејствата на загинатите во Кочани, по примерот на оние што починаа во пожарот во модуларната болница во Тетово, Мицкоски не даде конкретен одговор, туку дека како влада секогаш правеле и ќе прават сè за да им помогнат.
„Ги слушнав барањата. Апсолутно немам никаква дилема дека ние како влада правевме, правиме и ќе правиме сè што е потребно за да се помогне во тој случај, да се ублажи болката што е неизмерна, неограничена и голема“,
кажа премиерот.
Пратеничката од Левица, Јована Мојсоска, денеска рече дека власта предводена од ВМРО-ДПМНЕ нема веќе аргументи за одлагање надзорна расправа и формирање анкетна комисија за трагедијата во Кочани, имајќи предвид дека обвинителниот акт за случајот е поднесен пред повеќе од еден месец.
Инаку, за време на саботниот „Марш на ангелите“, во обраќањe пред Собранието, Наталија Ѓорѓиеска, сопругата на пејачот Андреј Ѓорѓиески од ДНК, кој загина во пожарот во „Пулс“, побара пратениците да иницираат надзорна расправа и посебна анкетна комисија за, како што рече, целосно и независно испитување на случајот.
Според неа, анкетната комисија е неопходна за проверка на постапувањето на сите институции од локално до централно ниво, да се утврди евентуална политичка или службена одговорност и да се подготват мерки кои ќе гарантираат дека ваква трагедија никогаш веќе никому нема да се случи.
На 19 ноември (среда) ќе почне судењето за случајот во кој се обвинети 35 физички лица и три фирми.