Во гаснењето на пожарот што избувна во скопско Трубарево во компанија што се занимава со електронски отпад, вклучени се шест противпожарни возила, неколку специјализирани возила на ДЗС, хеликоптери на МВР и на Армијата, како и еден авион за гаснење пожари на ДЗС, информира директорот на ЦУК, Мухамед Али
Директорот на Центарот за управување со кризи (ЦУК), Мухамед Али информира дека попладнево е на терен на местото каде избувна пожарот во скопско Трубарево и оттаму ја следи состојбата.
Како што информира тој, во 13:38 часот, преку единствениот број за итни повици 112, бил пријавен пожар во, како што вели, штала наменета за складирање отпадни електрични материјали.
Али додава дека пожарот за кратко време предизвикал густ и црн чад, а огнот се проширил на неколку околни објекти.
„Веднаш воспоставив координација со Центарот за управување со кризи и ги информирав надлежните служби за состојбата на терен, добивајќи насоки за понатамошни дејствија. Од страна на операторот ЕВН беше побарано итно исклучување на електричната енергија со цел да се овозможи безбедно гаснење на пожарот, вклучително и со употреба на воздухопловни средства“,
вели директорот на ЦУК, Мухамед Али.
Според него, за гаснење на пожарот се ангажирани шест противпожарни возила од Територијалната противпожарна бригада на Град Скопје со повеќе од десет пожарникари, како и неколку специјализирани возила на Дирекцијата за заштита и спасување (ДЗС).
„Дополнително, во гаснењето учествуваат еден хеликоптер на Министерството за внатрешни работи, еден хеликоптер на Армијата на Република Северна Македонија, како и еден ‘Ер Трактор’ на Дирекцијата за заштита и спасување. На терен се испратени и екипи на итната медицинска помош“,
вели тој.