Бугарскиот вицепремиер и министер за финансии, Асен Василев во изјава за софиската „Нова ТВ“ изјави дека пожарот кој се случи во бугарскиот културен центар во Битола не е насочен против Бугарија или Северна Македонија, туку против обидите да се постигне договор, а оти тоа доаѓа по многу долго време на разговори и ветувања, за да се дојде до точка на разбирање
Според него, подметнувањето на пожарот е нешто што нема шанси да не предизвика емоции, па оттука и да не влијае на преговорите
Подметнувањето на пожарот во бугарскиот културен центар во Битола, според бугарскиот вицепремиер и министер за финансии Асен Василев, е уште еден обид за разгорување на страстите, со цел, како што вели, да се спречи постигнување разумно решение од страна на министерствата за надворешни работи на Северна Македонија и Бугарија, заедничката Историската комисија и сите оние кои се трудат да најдат такво решение.
Василев во изјава за софиската „Нова ТВ“ изјави дека пожарот не е насочен против Бугарија или Северна Македонија, туку против обидите да се постигне договор, а оти тоа доаѓа по многу долго време на разговори и ветувања, за да се дојде до точка на разбирање.
Според него, подметнувањето на пожарот е нешто што нема шанси да не предизвика емоции, па оттука и да не влијае на преговорите.
„Се надевам дека тоа нема да има драматичен ефект“,
нагласи Василев, кој заедно со бугарскиот премиер Кирил Петков е копретседавач на партијата Промената продолжува (ПП).
Бугарскиот вицепремиер Василев смета дека прашањето со Северна Македонија не е ситуација поврзана со партијата Промената продолжува (ПП), туку со целата бугарска држава и народ, а оти Бугарија долго време не го поставувала тоа прашање.
„Подолго време молчевме за ова прашање со Република Северна Македонија. За разлика од Грција која 20 години викаше дека имаат проблем, а ние велевме дека нема проблем и во последен момент кажавме дека сепак има проблем“,
рече Василев, додавајќи дека проблемот постои и дека не може да се стави под тепих.
Тој истакна дека пораката што Софија ја добива од европските партнери е да седне со властите во Скопје и да постигне договор за откочување на пристапниот процес на земјава во ЕУ.
Првиот чекор кон ослободување на процесот, како што додаде Василев, е да ги убедиме нашите европски партнери дека не е Бугарија таа што треба да се разбере со Северна Македонија, туку дека ЕУ треба да се разбере со Република Северна Македонија
„Тоа значи дека ЕУ треба барем делумно да го прифати бугарскиот став дека има проблеми со говорот на омраза, со проблемите на Бугарите во Република Северна Македонија. И кога ЕУ ќе го прифати ова, проблемот ќе биде меѓу ЕУ и Република Северна Македонија, а не меѓу Република Северна Македонија и Бугарија. Сè додека немаме поширок ангажман и прифаќање на нашиот став, нема начин Бугарија да го укине ветото“,
нагласи Василев.