Директорот на ДЗС, Стојанче Ангелов, пак, информира дека чешкиот „блек хок“ во моментов е повлечен во Скопје бидејќи пожарот на Готен е под контрола, но доколку има потреба, тој ќе се вклучи во гасењето. Посочи дека и хеликоптерот од Чешка и словенечките пожарникари ќе останат во земјава најмалку седум дена
Пожарот на планината Готен кон Малешевските Планини во моментов е единствениот регистриран во државата и тој е под контрола, изјави на денешната прес-конференција директорот на Центарот за управување со кризи (ЦУК), Мухамед Али. На терен, како што рече, интервенираат специјалните возила на ДЗС, хеликоптерот на Чешка, беровските пожарникари, пожарникарите кои ги испрати Словенија и доброволци на „Национални шуми“.
Дека состојбата на планината Готен од беровска страна е смирена потврди и директорот на Дирекцијата за заштита и спасување (ДЗС), Стојанче Ангелов.
„За жал, поради чадот кој се крена после малиот дожд којшто падна во незначителна количина, на територијата се надлетува со дронови и се бараат жаришта под чадот. Доколку има жаришта, доколку пожарот покажува активност, гасењето ќе продолжи во раните утрински часови“,
изјави Ангелов.
Директорот на ДЗС додаде дека чешкиот „блек хок“ во моментов е повелечен во Скопје бидејќи пожарот на Готен е под контрола, но доколку има потреба, тој ќе се вклучи во гасењето. Посочи дека и хеликоптерот од Чешка и словенечките пожарникари ќе останат во земјава најмалку седум дена.
„Ако состојбата и натаму остане смирена, по истекот на тие седум дена тие ќе се повлечат. Ако дојде до повторно разгорување на некои сериозни пожари и ако процениме дека на нашите капацитети би им дошла помош од други сили, тогаш ќе разговараме за нивно понатамошно останување во државата“,
додаде Ангелов.
Тој апелира до граѓаните на голема внимателност за време на претстојниот празник Илинден, кога е поинтензивиран престојот во природа, за да не дојде до пожари со катастрофални последици бидејќи, како што рече, статистиката од минатите години пожажува дека околу Илинден има голем број пожари.