Според МВР, тој со товарното возило „мерцердес“ што го управувал удрил во банкината покрај коловозот во близина на клучката кај Хиподром
Возачот на товарното возило што денеска претпладне излета на патот Скопје – Куманово, кај клучката за Хиподром, се здобил со повреди и е пренесен во една од скопските болници, информираат од Министерството за внатрешни работи (МВР).
Оттаму соопштија детали за несреќата поради која сообраќајот на овој дел од патот од утринава е во прекин.
Според МВР, околу 9 часот во Секторот за внатрешни работи (СВР) Скопје било пријавено дека на скопската обиколница, кај клучката Хиподром, товарно возило, марка „мерцедес“ удрило во банкина покрај коловозот.
Возачот бил пренесен во Клиниката за хируршки болести „Св. Наум Охридски“ за укажување лекарска помош.
„Поради преземање мерки за отстранување на возилото од коловозот, сообраќајот во овој дел од автопатот е во прекин, а возилата се пренасочуваат преку автопатот Скопје – Велес“,
се додава во соопштението на МВР, објавено на неговата официјална фејсбук-страница.
За прекинот на сообраќајот поради излетано товарно возило кај клучката за Хиподром првично информира Автомото сојузот на Македонија (АМСМ).