„Независноста на судскиот систем е од клучно значење за владеењето на правото и поделбата на власта, кои се фундаментални вредности за патот на Северна Македонија кон ЕУ“, вели Томас Вајц во кратката изјава која доаѓа по изгласувањето недоверба на пет члена на Судскиот совет во Собранието пред два дена
Одговарајќи на новинарски прашања на истата тема, американската амбасадорка во земјава Анџела Агелер денеска изјави оти не може да коментира, но додаде дека многу внимателно ги следат процедурите во парламентот, како и изјавите во врска со нив
Загрижувачки знак за политичко мешање во судството. Вака актуелниот известувач за Северна Македонија во Европскиот парламент (ЕП), Томас Вајц го оценува во, како што вели, во својата кратка изјава притисокот на владината коалиција врз членовите на Судскиот совет да си поднесат оставки или да бидат разрешени врз основа на нивната наводна политичка припадност.
Изјавата на Вајц доаѓа откако пред два дена, односно на 11 март, Собранието им изгласа недоверба на петтемина членови на Судскиот совет, избрани од законодавниот дом.
Имено мнозинството пратеници ги поддржа интерпелациите на Весна Дамева, Павлина Црвенковска, Тања Чачарова-Иливеска, Миљазим Мустафа и Селим Адеми, а аргументите за ваквата одлука наведени во изгасаните заклучоци беа дека тие имале „значителен придонес во загрозување на независноста, професионалноста и угледот на судството и придонеле за падот на довербата на граѓаните кон судството“. Воедно, се наведува дека ја занемариле и не ја извршувале својата функција во работата на Советот, а поради изгласаната недоверба, го губат легитимитетот да учествуваат и одлучуваат во работата на Судскиот совет.
„Овој повик од владата е загрижувачки знак за политичко мешање во судството. Независноста на судскиот систем е од клучно значење за владеењето на правото и поделбата на власта, кои се фундаментални вредности за патот на Северна Македонија кон ЕУ“,
се вели во кратката изјава на известувачот на Северна Македонија во Европскиот парламент Томас Вајц.
Инаку, интерпелциите на овие членови на Судскиот совет не значат и престанок на нивните функции, односно тие не повлекуваат правно дејство, поради што од власта, особено од стожерната партија во владејачката коалиција ВМРО-ДПМНЕ, изминатите денови се погласни се повиците до овие членови на Судскиот совет да поднесат оставки.
За коментар на темата денеска беше прашана и американската амбасадорка во земјава, Анџела Агелер. Таа кажа дека не може да даде коментар, но рече дека амбасадата на САД многу внимателно ги следи процедурите во парламентот, како и изјавите во врска со нив.
„Она што е најважно за секој од овие случаи е да се следи законот на јасен и транспарентен начин за сите оние кои го набљудуваат“,
изјави амбасадорката.
Премиерот, Христијан Мицкоски, кој заедно со Агелер присустуваше на ист настан, одговарајќи на новинарско прашање изјави дека 95 проценти од судиите и обвинителите работата чесно, но рече оти има и такви кои останале партиски измеќари и им слугуваат на тие кои ги предложиле. Според премиерот, последниот браник и цврст штит на поранешната влада на СДСМ и ДУИ се дел од судиите и дел од обвинителите, меѓу кои и државниот јавен обвинител Љупчо Коцевски за кого во тек е постапка за негово разрешување од функцијата.
„Најголемиот дел би рекол, 95 проценти од обвинителите и судиите се луѓе кои чесно си ја работата својата работа, кои обвинуваат според закон и Устав, судат според закон и Устав, но за жал има и такви кои останаа да бидат партиски измеќари и коишто ценат дека кога ќе ја облечат тогата наместо да заборават на партиските привилегии и оние коишто ги предложиле таму тие сè уште се верни слуги на истите коишто на времето, бидејќи ете такви се законите и процедурите, ги предложиле да бидат таму кадешто се“,
изјави Мицкоски.
На новинарско прашање за тоа дали се разговарало за можни нови членови на Судскиот совет, премиерот рече дека „немаат однапред спремено тефтерчиња во коишто се наоѓаат имиња, како тие што беа во Речица и на Бихаќка“.
„Последните случувања за избор на вршител на должноста претседател на Врховниот суд, името коешто е избрано, е дополнителен мотив овие членови на Судскиот совет да бидат разрешени“,
додаде Мицкоски.
Ова се однесува на одлуката на Сдускиот совет кој деновиве со 10 гласа „за“ и два „против“ го определи судијата Џемали Саити за в.д. претседател на Врховниот суд, до изборот на новиот претседател за што постапката е во тек.