„Професионалното и етичко известување е обврска на медиумите и новинарите, додека новинарските организации имаат улога да ги промовираат стандардите, да укажуваат на нивното значење и да реагираат кога тие се прекршуваат. Но, тие не можат и не треба да бидат ставени во позиција да ‘гарантираат’ за секоја објава или уредувачка одлука“, се вели во реакцијата
Самостојниот синдикат на новинари и медиумски работници (ССНМ) и Здружението на новинари на Македонија (ЗНМ) реагираат на денешното соопштение на Основното јавно обвинителство, во кое од новинарите се бара „внимателно и одговорно јавно коментирање и информирање“, а од професионалните организации се очекува „да го гарантираат почитувањето на етичките стандарди за известување и воздржаност при јавно коментирање“.
Реакцијата на обвинителството, се вели во заедничкото соопштение, следува откако во јавноста се отворија легитимни прашања по неизборот на обвинителката која го водеше процесот против полицајците за случајот „Пулс“, односно дали оваа промена може да се одрази врз текот и времетраењето на постапката.
„Наместо прецизно да укаже на евентуални конкретни пропусти во известувањето, ОЈО со денешното јавно соопштение генерално предупредува дека шпекулациите и невистините поврзани со предметите за кочанската трагедија можат да предизвикаат дополнителна вознемиреност кај семејствата на жртвите и кај јавноста“,
се вели во соопштението од ССНМ и ЗНМ.
Оттаму сметаат дека ваквиот повик, може негативно да се протолкува во јавноста, особено ако не е јасно наведено на кои конкретни случаи на неетичко или непрофесионално известување се однесува.
„Во таков контекст, пораката може да остави впечаток на обид да се стишаат критичките гласови и да се ограничи јавната дебата за прашања од висок јавен интерес“,
се додава во соопштението.
Ова денеска, како што информираат, тие го посочиле и во директна комуникација со претставници на обвинителството, со цел да се надминат можните недоразбирања што произлегуваат од содржината на нивното соопштение.
„Професионалното и етичко известување е обврска на медиумите и новинарите, додека новинарските организации имаат улога да ги промовираат стандардите, да укажуваат на нивното значење и да реагираат кога тие се прекршуваат. Но, тие не можат и не треба да бидат ставени во позиција да ‘гарантираат’ за секоја објава или уредувачка одлука“,
се вели во реакцијата.
Од ССНМ и ЗНМ потсетуваат дека во случаи кога постои сомнеж за неетичко и непрофесионално известување, веќе постојат механизми за постапување, меѓу кои се претставките до Советот на честа при ЗНМ и до Советот за етика во медиумите во Македонија.
Денеска од Јавното обвинителство рекоа дека веќе се преземени сите чекори за да се овозможи ефикасно и непречено водење на сите тековни постапки и оти ниту еден процес што е веќе започнат нема да претрпи неоправдано одолговлекување или, пак, усложнување, додека пак во судница ќе има јавен обвинител што ќе е подготвен да го застапува обвинението.
Соопштението од Јавното обвинителство доаѓа по вчерашната реакција на родителите на жртвите од „Пулс“ кои на маршот во Кочани побараа враќање на обвинителката Ивана Алексова-Трајчева на случаите поврзани со трагедијата во Кочани откако не ѝ беше продолжен мандатот во Обвинителството за гонење организиран криминал и корупција.
Според родителите, преминувањето на предметот кај нов обвинител кој ќе мора од почеток да се запознава со случајот и со обемните докази носи огромен ризик од дополнителни одложувања и нарушување на континуитетот на постапката.